സസ്യാഹാരം കഴിക്കുന്ന കുട്ടികള്ക്ക് അവരുടെ മാംസാഹാരം കഴിക്കുന്ന സമപ്രായക്കാരെപ്പോലെ പോഷണവും വളര്ച്ചയും സമാനമായ അളവിലുണ്ടാകാമെങ്കിലും ഭാരക്കുറവ് ഉണ്ടാകാനുള്ള സാധ്യത ഇരട്ടിയോളമെന്ന് പഠനം. പീഡിയാട്രിക്സ് ജേണലില് മെയ് രണ്ടിന് പ്രസിദ്ധീകരിച്ച ഒരു പഠന റിപ്പോര്ട്ടിലാണ് ഇക്കാര്യം പറയുന്നത്. സെന്റ് മൈക്കല്സ് ഹോസ്പിറ്റല് ഓഫ് യൂണിറ്റി ഹെല്ത്ത് ടൊറന്റോയിലെ ഒരു സംഘം ഗവേഷകര് ആറ് മാസത്തിനും എട്ട് വയസിനും ഇടയില് പ്രായമുള്ള 9,000 കുട്ടികളിലാണ് ഇത് സംബന്ധിച്ച പഠനം നടത്തിയത്. അവരുടെ ഭക്ഷണക്രമം ,അവരുടെ ഉയരം, ഭാരം, പോഷകാഹാരം എന്നിവയുമായി താരതമ്യം ചെയ്താണ് റിപ്പോര്ട്ട് തയ്യാറാക്കിയിരിക്കുന്നത്. .
സസ്യാഹാര ഭക്ഷണരീതികള് പിന്തുടര്ന്ന 338 കുട്ടികള്ക്കും മാംസാഹാരം കഴിക്കുന്ന ഇത്രയും കുട്ടികള്ക്കും സമാനമായ ഉയരവും വളര്ച്ചയുടെ അടയാളങ്ങളുമുണ്ടെന്ന് അവര് കണ്ടെത്തി. ഗവേഷകരുടെ അനുമാനത്തിന് വിരുദ്ധമായി, മാംസാഹാരം കഴിക്കുന്നവരെപ്പോലെ തന്നെ സസ്യാഹാരികള്ക്കും ഇരുമ്പ്, വിറ്റാമിന് ഡി തുടങ്ങിയ പോഷകങ്ങള് ലഭിച്ചതായി കണ്ടെത്തി. ഇത് സസ്യാഹാരികളായ കുട്ടികള്ക്ക് മാംസം കഴിക്കാതെ തന്നെ ഭക്ഷണത്തില് ആവശ്യത്തിന് പോഷണം ലഭിക്കുമെന്ന് സൂചിപ്പിക്കുന്നു.
എന്നിരുന്നാലും, ബോഡി മാസ് ഇന്ഡക്സ് അല്ലെങ്കില് ഭാരത്തിന്റെയും ഉയരത്തിന്റെയും അനുപാതത്തെ അടിസ്ഥാനമാക്കി, സസ്യാഹാരികളായ കുട്ടികള് മാംസാഹാരം കഴിക്കുന്നവരേക്കാള് ഏകദേശം ഇരട്ടി ഭാരക്കുറവുള്ളവരായിരുന്നു.ഭാരക്കുറവ് പോഷകാഹാരക്കുറവിന്റെ ഉയര്ന്ന അപകടസാധ്യതയെ സൂചിപ്പിക്കാം. അല്ലെങ്കില് ശരിയായ വളര്ച്ചയ്ക്ക് ആവശ്യമായ കലോറികളുടെയും പോഷകങ്ങളുടെയും അഭാവം എന്നിവയെ കാണിക്കുന്നുവെന്നും ഗവേഷകര് അനുമാനിക്കുന്നു. എന്നിരുന്നാലും, ഇക്കാര്യത്തില് കൂടുതല് ഗവേഷണം ആവശ്യമാണ്. കാരണം , ശാരീരിക പ്രവര്ത്തനങ്ങളും പ്രത്യേക ഭക്ഷണങ്ങളും ഉള്പ്പെടെയുള്ള മറ്റ് ജീവിതശൈലി ഈ അനുമാനങ്ങളെ ശരിവെക്കണമെന്നില്ലെന്നും ഗവേഷകര് പറയുന്നു.
സസ്യാഹാരികളായ കുട്ടികള്ക്ക് ആവശ്യമായ പോഷണം ലഭിക്കുന്നുണ്ടെന്ന് ഉറപ്പുവരുത്താന് സൂക്ഷ്മമായ ആസൂത്രണം പ്രധാനമാണെന്ന് പഠന സംഘത്തിലെ പ്രധാനിയും സെന്റ് മൈക്കിള്സ് ഹോസ്പിറ്റല് ഓഫ് യൂണിറ്റി ഹെല്ത്ത് ടൊറന്റോയിലെ ശിശുരോഗവിദഗ്ധനുമായ ഡോ. ജോനാഥന് മാഗ്വയര് അഭിപ്രായപ്പെടുന്നു.പഴങ്ങള്, പച്ചക്കറികള്, നാരുകള്, ധാന്യങ്ങള്, കുറഞ്ഞ പൂരിത കൊഴുപ്പ് എന്നിവ കാരണം സസ്യങ്ങളെ അടിസ്ഥാനമാക്കിയുള്ള ഭക്ഷണരീതികള് ആരോഗ്യകരമായ ഭക്ഷണരീതിയായി അംഗീകരിക്കപ്പെട്ടിരിക്കുന്നുവെന്നും മാഗ്വെയര് പറഞ്ഞു.
ഈ പഠനത്തിന്റെ ഒരു പ്രധാന പരിമിതി, അത് മാംസാഹാരത്തെ ഒഴിവാക്കിയുള്ളതാണ് എന്നതിന് അപ്പുറം സസ്യാഹാരത്തിന്റെ ഗുണനിലവാരം വിലയിരുത്തിയിട്ടില്ല എന്നതാണ്.പച്ചക്കറികള്, ധാന്യങ്ങള്, ബീന്സ്, പരിപ്പ്, പഴങ്ങള് എന്നിവയാല് സമ്പന്നമായ സസ്യാധിഷ്ഠിത ഭക്ഷണക്രമം മികച്ചതായി കണക്കാക്കുന്നു. എന്നാല് ഏറെ പ്രോസസ്സ് ചെയ്ത പല ഭക്ഷണങ്ങളും വെജിറ്റേറിയന് ആണ്. ഉദാഹരണത്തിന് പഞ്ചസാര, ഉപ്പ്, പ്രിസര്വേറ്റീവുകള് എന്നിവയുടെ ഉയര് അളവിലുള്ള ഉപയോഗം അത്ര ആരോഗ്യദായകമല്ല
2021ല് നടത്തിയ ഒരു പഠനത്തില് സംസ്കരിച്ച സസ്യാഹാരങ്ങള് കഴിക്കുന്നത് കുട്ടികളില് കൊളസ്ട്രോളിന്റെയും രക്തത്തിലെ പഞ്ചസാരയുടെയും അളവ് വര്ദ്ധിപ്പിച്ചതായി കണ്ടെത്തി.സസ്യങ്ങളെ അടിസ്ഥാനമാക്കിയുള്ള ഭക്ഷണക്രമം ആരോഗ്യദായകമെന്ന് എപ്പോഴും പറയാനാകില്ലെന്നും ആരോഗ്യകരമായ ഭക്ഷണങ്ങള് തിരഞ്ഞെടുക്കുകയാണ് വേണ്ടതെന്നും ഗവേഷകര് പറയുന്നു.മാംസം, പാലുല്പ്പന്നങ്ങള്, മുട്ട, തേന് തുടങ്ങിയ മറ്റ് മൃഗ ഉല്പന്നങ്ങളും ഒഴിവാക്കുന്ന സസ്യാഹാര ഭക്ഷണരീതികളെക്കുറിച്ചും കൂടുതല് ഗവേഷണം ആവശ്യമാണ്.
2021-ലെ അതേ പഠനം സൂചിപ്പിക്കുന്നത്, സസ്യാഹാരം കഴിക്കുന്ന കുട്ടികള്ക്ക് കാല്സ്യം, ബി വിറ്റാമിനുകള് തുടങ്ങിയ ധാതുക്കളുടെയും വിറ്റാമിനുകളുടെയും കുറവുകള് ഉണ്ടാകാനുള്ള സാധ്യത കൂടുതലാണ്, ഇത് അസ്ഥികളുടെ ആരോഗ്യത്തെ പ്രതികൂലമായി ബാധിക്കും. എന്നിരുന്നാലും, സസ്യാഹാരം കുട്ടികള്ക്ക് ആരോഗ്യകരമായ കൊളസ്ട്രോളും ഹൃദയാരോഗ്യത്തിന്റെ മറ്റ് നല്ല ലക്ഷണങ്ങളും കാണിക്കുന്നതായി പഠനം പറയുന്നു