ആരോഗ്യനില വഷളായതിനെ തുടര്‍ന്ന് ആശുപത്രിയില്‍ പ്രവേശിപ്പിച്ച ഫിറ്റ്‌നസ് ഇന്‍ഫ്‌ളുവന്‍സര്‍ ലെക്‌സി റീഡ് ആശുപത്രി വിട്ടു. ആശുപത്രി വിട്ടുവെങ്കിലും ഇവര്‍ക്ക് നടക്കാന്‍ കഴിയുന്നില്ലെന്നാണ് അന്താരാഷ്ട്ര മാധ്യമങ്ങള്‍ റിപ്പോര്‍ട്ടു ചെയ്യുന്നത്. രണ്ട് വര്‍ഷത്തിനുള്ളില്‍ ശരീര ഭാരം 217ല്‍ നിന്നും 78 കിലോയിലേക്ക് കുറച്ച് ലോകം മുഴുവനുള്ള ജനങ്ങള്‍ക്ക് പ്രചോദനമായി മാറിയ ലെക്‌സി റീഡിന്റെ ആരോഗ്യനില വഷളായതിനെ തുടര്‍ന്നാണ് ഇവരെ ആശുപത്രിയില്‍ പ്രവേശിപ്പിച്ചത്. ശരീരഭാരം അമിതമായി കുറഞ്ഞത് തന്നെയാണ് ആരോഗ്യനില വഷളാകാന്‍ കാരണം. ശരീരത്തിലെ അവയവങ്ങള്‍ പ്രവര്‍ത്തന രഹിതമാകാന്‍ തുടങ്ങിയതിനെത്തുടര്‍ന്ന് ലെക്‌സിയെ ഉടന്‍ തന്നെ ആശുപത്രിയില്‍ പ്രവേശിപ്പിക്കുകയായിരുന്നു.
ലെക്‌സി റീഡിന്റെ ആരോഗ്യനില സംബന്ധിച്ച് ഭര്‍ത്താവ് ഡാനിയാണ് ഇന്‍സ്റ്റാഗ്രാമിലൂടെ ലോകത്തെ അറിയിച്ചത്. മെഡിക്കല്‍ ഉപകരണളുടെ സഹായത്തോടെ ലെക്‌സി ആശുപത്രി കിടക്കയില്‍ അബോധാവസ്ഥയില്‍ കിടക്കുന്ന ഒരു ചിത്രവും നിലവിലെ സ്ഥിതി സംബന്ധിച്ച ഒരു ചെറു കുറിപ്പും ഡാനി പോസ്റ്റ് ചെയ്തു.

ആശുപത്രിയില്‍ പ്രവേശിപ്പിക്കപ്പെടുന്നതിന് ഏതാനും ആഴ്ചകള്‍ക്ക് മുമ്പ് തന്നെ ലെക്‌സിക്ക് അമിിതമായ ക്ഷീണം അനുഭവപ്പെട്ടിരുന്നു. ഭക്ഷണം കഴിക്കാന്‍ സാധിച്ചിരുന്നില്ലെന്നും കുറിപ്പില്‍ ഡാനി പങ്കിട്ടു. ലെക്‌സിയുടെ ആരോഗ്യനില വഷളാകുന്നതായി തോന്നിയതോടെ ആശുപത്രിയില്‍ പ്രവേശിപ്പിക്കുകയായിരുന്നുവെന്നും ഡാനി പറഞ്ഞു. തുടര്‍ന്ന് ഐസിയുവില്‍ പ്രവേശിപ്പിക്കുകയായിരുന്നു.

ആശുപത്രിയില്‍ കൊണ്ടുവരാന്‍ താമസിച്ചിരുന്നെങ്കില്‍ ജീവന്‍ തന്നെ നഷ്ടപ്പെടാന്‍ സാധ്യതയുണ്ടായിരുന്നുവെന്നും അവര്‍ പറഞ്ഞു,’ ഡാനി പോസ്റ്റില്‍ കുറിച്ചു. ലെക്‌സിയ്ക്ക് ഇപ്പോള്‍ ഡയാലിസിസ് ചെയ്യുന്നുണ്ടെന്നും അതിനാല്‍ നടക്കാന്‍ കഴിയില്ലെന്നും അദ്ദേഹം കൂട്ടിച്ചേര്‍ത്തു. ലെക്‌സിയുടെ ചികിത്സയ്ക്കായി ആരോഗ്യ ഇന്‍ഷുറന്‍സ് ഇല്ലെന്നും ഡാനി ഇപ്പോള്‍ ലെക്‌സിയുടെ ചികിത്സയ്ക്കായി ആളുകളില്‍ നിന്ന് ധനസഹായം തേടുന്നതായും ഡെയ്‌ലി മെയില്‍ റിപ്പോര്‍ട്ടില്‍ പറയുന്നു.

അമേരിക്കയിലെ ഇന്ത്യാന സ്റ്റേറ്റില്‍ നിന്നുള്ള പ്രശസ്ത ഫിറ്റ്‌നസ് ഇന്‍ഫ്‌ലുവന്‍സറാണ് ലെക്‌സി റീഡ്. 31 കാരിയായ ലെക്‌സിക്ക് 217 കിലോ ഗ്രാം ഭാരം ഉണ്ടായിരുന്നു. രണ്ട് വര്‍ഷത്തെ കഠിന ശ്രമത്തിന് ശേഷം 78 കിലോയായി ഇവരുടെ ശരീര ഭാരം കുറഞ്ഞു. ശരീര ഭാരം കുറക്കുന്ന യാത്രയിലെ വിവിധ സന്ദര്‍ഭങ്ങള്‍ ഇവര്‍ സോഷ്യല്‍ മീഡിയയിലൂടെ പങ്കുവെച്ചിരുന്നു. ലക്ഷക്കണക്കിന് ആരാധകരാണ് ലെക്‌സിക്കുണ്ടായിരുന്നത്. ഭര്‍ത്താവ് ഡാനിയും ലെക്‌സിയുടെ ഫിറ്റ്‌നസ് യാത്രയില്‍ എല്ലാ വിധ പിന്തുണയുമായി കൂടെ ഉണ്ടായിരുന്നു. ശരീരഭാരം ഗണ്യമായി കുറഞ്ഞപ്പോള്‍ ലെക്‌സിയുടെ ചര്‍മ്മം തൂങ്ങിക്കിടന്നു. പിന്നീട് അവളുടെ ശരീരത്തില്‍ നിന്ന് അധിക ചര്‍മ്മം നീക്കം ചെയ്യാന്‍ ഒന്‍പത് മണിക്കൂര്‍ നീണ്ട ശസ്ത്രക്രിയയ്ക്ക് വിധേയയാക്കിയിരുന്നു.

ഡാനിയും ലെക്‌സിയെപ്പോലെ ശരീര ഭാരം കുറച്ചയാളാണ്. 94 കിലോ ആയിരുന്ന തന്റെ ഭാരത്തില്‍ നിന്ന് 43 കിലോയാണ് ഡാനി കുറച്ചത്.

ഒരു ആഴ്ച കൊണ്ട് തടി കുറക്കാം, ഒരു മാസം കൊണ്ട് … ഇതിലെ അപകടങ്ങള്‍ അറിഞ്ഞിരിക്കണം

കൂടിയ തടി കുറക്കുകയെന്നത് എല്ലാവരുടേയും ആഗ്രഹമാണ്. പലരുടെയും പുതുവര്‍ഷ പ്രതിജ്ഞകളിലൊന്നും ഇതായിരിക്കും. ശരീര ഭാരം കുറക്കാന്‍ പുതുവഴി തേടി നടക്കുന്നവരെ കെ ണിയില്‍പ്പെടുത്താല്‍ പല വിധ പ്രലോഭനവുമായി പലരും രംഗത്തുണ്ട്. അതില്‍ ഒന്നാണ് 30 ദിവസത്തിനുള്ളില്‍ വണ്ണം കുറക്കാം, ഒരാഴ്ചക്കുള്ളില്‍ വണ്ണം കുറക്കാം തുടങ്ങിയ പരസ്യങ്ങള്‍. എന്നാല്‍ ഇത്തരത്തില്‍ ശരീര ഭാരം പെട്ടന്ന് കുറക്കുന്നത് ശരീരത്തെ എങ്ങനെ ബാധിക്കുമെന്ന കാര്യം കൂടി അറിഞ്ഞിരിക്കേണ്ടതുണ്ട്.

ശാരീരിക അസ്വസ്തകള്‍ക്ക് പുറമെ മാനസിക പരിമുറുക്കവും സമ്മര്‍ദവും ഇത്തരക്കാരില്‍ കണ്ടുവരുന്നുണ്ട്. പ്രലോഭനകരമായ പരസ്യങ്ങളില്‍ കുടുങ്ങി വണ്ണം കുറക്കാന്‍ കൊതിക്കുന്നവര്‍ അവ ഉയര്‍ത്തുന്ന ശാരീരിക പ്രശ്‌നങ്ങള്‍ അറിഞ്ഞിരിക്കണം.

പെട്ടന്ന് കുറക്കുന്ന വണ്ണം തിരികെ വരാന്‍ സാധ്യത കൂടുതലാണെന്ന് പ്രമുഖ പോഷകാഹാര വിദഗ്ധര്‍ പറയുന്നു. ശരീരത്തെ പാകപ്പെടുത്തി എടുക്കാതെയുള്ള വണ്ണം കുറക്കലായതിനാലാണ് ഈ സാധ്യത. ശരീരം ഈ മാറ്റത്തെ ഉള്‍ക്കൊള്ളാത്തതിനാലാണ് പോയ വണ്ണം അധികം വൈകാതെ തിരികെയത്തെുക.

നിര്‍ജലീകരണത്തിലൂടെയാണ് ഏറെ ഭാരം കുറക്കലുകളും നടത്തുന്നത്. ശരീരഭാരത്തിന്റെ ഏറിയ പങ്കും വെള്ളമാണ് എന്നതാണ് ഇതിന് കാരണം. ശരീരത്തില്‍ നിന്ന് വെള്ളം നഷ്ടപ്പെടുന്നത് തലകറക്കം,മയക്കം,ഹൃദയ സംബന്ധമായ പ്രശ്‌നങ്ങള്‍ എന്നിവ ഉണ്ടാക്കാന്‍ സാധ്യതയേറെയാണ്. മസിലുകള്‍ക്ക് ക്ഷതമുണ്ടാക്കുന്നതിനൊപ്പം അപൂര്‍വ അവസരങ്ങളില്‍ മരണത്തിന് വരെ ഇത് കാരണമാകും.

ഭാരം കുറക്കല്‍ ചികില്‍സക്ക് വിധേയമാകുന്നവര്‍ അതിവേഗം ക്ഷീണിതരാകും. വ്യായാമത്തിലൂടെ അമിതമായ കൊഴുപ്പ് നശിപ്പിച്ച് കളയുന്നതിന് പകരം കുറഞ്ഞ കാലറിയുള്ള ഭക്ഷണങ്ങള്‍ കഴിക്കുകയാണ് ചെയ്യുക. ഇതുവഴി ശരീരത്തിന് വേണ്ട ഊര്‍ജം ലഭിക്കാതെ വരുകയും അതിവേഗം ക്ഷീണിതരാവുകയും ചെയ്യും.

പെട്ടന്നുള്ള ഭാരം കുറക്കല്‍ പിത്താശയത്തില്‍ കല്ലുകള്‍ രൂപപ്പെടാനിടയാക്കുമെന്ന് പോഷകാഹാര വിദഗ്ധര്‍ പറയുന്നു. കരളിന് തൊട്ടുതാഴെയുള്ള ചെറിയ സഞ്ചി പോലെയുള്ള പിത്താശയം ആവശ്യമെങ്കില്‍ കൊഴുപ്പ് ശേഖരിക്കാനുള്ള ഇടമാണ്. പെട്ടന്ന് ഭാരം കുറക്കുന്നതിലൂടെ ഇവിടെയുള്ള കൊളസ്‌ട്രോള്‍ കല്ലുകളുടെ രൂപത്തിലാവുകയാണ് ചെയ്യുക. ഇവ ചെറുകുടലിലേക്കുള്ള പിത്തസ്രവത്തിന്റെ സഞ്ചാരം തടസപ്പെടുത്തുന്നതിലൂടെ രോഗബാധക്ക് സാധ്യതയേറെയാണ്.

ഭാരം കുറക്കലിന് വിധേയമാകുന്നവര്‍ക്ക് ഭക്ഷണ കാര്യത്തില്‍ കടുത്ത നിയന്ത്രണങ്ങളുണ്ടാകും. ഇതിലൂടെ ശരീരത്തിന് ആവശ്യമായ പോഷകങ്ങള്‍ ലഭിക്കാത്ത അവസ്ഥയുണ്ടാകും. ചില ഭക്ഷണങ്ങള്‍ തീര്‍ത്തും ഉപേക്ഷിച്ചും പട്ടിണി കിടന്നുമൊക്കെ അതിവേഗം ഭാരം കുറക്കാന്‍ ശ്രമിക്കുമ്പോള്‍ സമ്മര്‍ദം ഉണ്ടാക്കുന്ന ഹോര്‍മോണായ കോര്‍ട്ടിസോള്‍ കൂടുതലായി ഉല്‍പ്പാദിപ്പിക്കപ്പെടും. ഭക്ഷണത്തിലെ കുറവ് മൂലമാണ് ഇതുണ്ടാകുന്നത്. ഈ ഹോര്‍മോണിന്റെ അമിത സാന്നിധ്യം മൂലം നിങ്ങള്‍ മാനസികമായും ശാരീരകവുമായും വികാരപരവുമായി സമ്മര്‍ദത്തിന് അടിപ്പെട്ടിരിക്കും.

തടി കുറക്കാന്‍ പട്ടിണിയുടെ വഴി അവലംബിക്കുമ്പോഴേ ശരീരം കോശങ്ങള്‍ക്ക് അതിന്റെ സൂചനകള്‍ നല്‍കും. കോശങ്ങള്‍ ഇതനുസരിച്ച് കഴിക്കുന്ന ഭക്ഷണം കൂടുതലായി ശേഖരിച്ചുവെക്കും. നിങ്ങള്‍ സാധാരണ ഭക്ഷണ ക്രമത്തിലേക്ക് മാറുമ്പോള്‍ നഷ്ടപ്പെട്ട ഭാരം തിരികെ വരുന്നതിനൊപ്പം കുറച്ചുഅധിക ഭാരവും കൊഴുപ്പും കൂടി നിങ്ങള്‍ക്ക് ലഭിക്കും. തടി കുറച്ചാലും അപകടം മതിയായ പോഷകങ്ങളുടെ അഭാവം നിമിത്തം മസില്‍ വീക്കം, അനീമിയ,മലബന്ധം തുടങ്ങിയ പ്രശ്‌നങ്ങളും കണ്ടുവരാറുണ്ട്.