Workouts
ബൈസിക്കിള്‍ ക്രഞ്ചസ്; വീട്ടില്‍ വെച്ച് കുടവയര്‍ കുറക്കാനൊരു മാര്‍ഗം
അനാരോഗ്യകരമായ ജീവിത ശൈലി നമ്മുടെ ശരീരത്തില്‍ പലതരത്തിലാണ് പ്രതിഫലിക്കുക. ജങ്ക് ഫുഡുകളുടെ ഉപയോഗവും വ്യായാമരഹിതമായ ജീവിത രീതികളും പലപ്പോഴും നമുക്ക് സമ്മാനിക്കുക അമിത വണ്ണവും അസുഖങ്ങളുമാകും. ശരീരത്തില്‍ കൊഴുപ്പുകള്‍ അടിഞ്ഞു കൂടുന്നത്് ആദ്യം പ്രതിഫലിക്കുക വയറിലായിരിക്കും. കുടവയര്‍ കണ്ടു തുടങ്ങുമ്പോഴാണ് പലരും വ്യായാമത്തെ കുറിച്ച്് ചിന്തിച്ചു തുടങ്ങുക. ശരീരത്തില്‍ ആദ്യം കൊഴുപ്പടിയുന്നത് വയറിലാണ്. വയറില്‍ അടിഞ്ഞു കൂടുന്ന അനാവശ്യ കൊഴുപ്പകറ്റി ശരീര ഭംഗി വീണ്ടെടുക്കാന്‍ സഹായിക്കുന്ന ഒരു വര്‍ക്കൗട്ടിനെ കുറിച്ചാണ് ഇനി പറയുന്നത്. ബൈസിക്കിള്‍ ക്രഞ്ചസ് എന്നാണ് ഈ വ്യായാമ രീതിയുടെ പേര്. വീട്ടില്‍വെച്ച് തന്നെ യാതൊരു ഉപകരണങ്ങളുടേയും സഹായമില്ലാതെ പരിശീലിക്കാവുന്ന ഒരു വ്യായാമമാണിത്. വയറിലെ കൊഴുപ്പുകളെ അകറ്റി പേശികള്‍ ബലമുള്ളതാക്കാന്‍ ഏറെ സഹായിക്കുന്ന ഒരു വര്‍ക്കൗട്ടാണിത്.
വയറിലെ പേശികളില്‍ പ്രവര്‍ത്തിക്കുന്ന ഒരു ക്ലാസിക് കോര്‍ വ്യായാമ രീതിയാണ് ക്രഞ്ചസ്. ആബ്സ്, പെല്‍വിസ്, പുറം, വയറിന്റെ വശങ്ങള്‍ എന്നിവയുടെ ചുറ്റുമുള്ള പേശികളെ പുഷ്്ടിപ്പെടുത്താന്‍ ഈ വര്‍ക്കൗട്ട് സഹായിക്കും. ക്രഞ്ചിന്റെ വ്യത്യസ്ത വ്യതിയാനങ്ങള്‍ പലരും പരിശീലിക്കാറുണ്ട്്. അത്തരം വ്യതിയാനങ്ങളിലൊന്നാണ് ബൈസിക്കിള്‍ ക്രഞ്ചസ്.
ഈ വ്യായാമം നിങ്ങളുടെ വയറിലെ പേശികളിലും വശങ്ങളിലും പ്രവര്‍ത്തിക്കുന്നു. ഈ വ്യായാമം തെറ്റായ രീതിയില്‍ ചെയ്യുന്നത് പരുക്കുകള്‍ക്ക് കാരണമായേക്കാം. അതിനാല്‍ ബൈസിക്കിള്‍ ക്രഞ്ചസ് ശരിയായ രീതിയില്‍ വേണം ചെയ്യാന്‍.
ബൈസിക്കിള്‍ ക്രഞ്ചസ് ചെയ്യേണ്ട വിധം
= മലര്‍ന്ന് കിടക്കുക.
=ചെവികള്‍ക്ക് പിന്നിലായി കൈകള്‍ വെക്കാം. തലയ്ക്ക് പിന്നില്‍ കൈകള്‍ കോര്‍ത്ത് പിടിക്കുകയുമാകാം.
= അരയ്ക്ക് മേല്‌പോട്ടുള്ള ഭാഗം മാത്രം ഉയര്‍ത്തുക
=വലതുകാല്‍ നീട്ടി പിടിക്കുക. ഇടതുകാല്‍ മടക്കി നെഞ്ചിന്റെ ഭാഗത്തേയ്ക്ക് കൊണ്ടുവരാം.
= ഇനി ഇടതുകാല്‍ നീട്ടുകയും വലതുകാല്‍ നെഞ്ചിനോട് ചേര്‍ത്ത് കൊണ്ടുവരാന്‍ ശ്രമിക്കുകയും വേണം.
=അതായത് കിടന്നുകൊണ്ട് ഒരു സൈക്കിള്‍ ചവിട്ടുന്നത് പോലെ ചെയ്യാന്‍ ശ്രമിക്കണം.
=ഈ വ്യായാമം ചെയ്യുമ്പോള്‍ നിങ്ങളുടെ തോള്‍ഭാഗം തറയില്‍ നിന്ന് അല്പം ഉയര്‍ത്തി പിടിക്കാന്‍ ശ്രദ്ധിക്കുക.
ഈ വ്യായാമം ചെയ്യുമ്പോള്‍ പ്രത്യേകം ശ്രദ്ധിക്കേണ്ട ഒരു കാര്യം കൈകള്‍ കൊണ്ട് കഴുത്തിന് സമ്മര്‍ദം കൊടുക്കരുതെന്നാണ്.