മേനേ പ്യാര്‍കിയാ എന്ന ഒറ്റച്ചിത്രത്തിലൂടെ മലയാളികളുടെയടക്കം ഇഷ്ടം പിടിച്ചുപറ്റിയ നടിയാണ് ഭാഗ്യശ്രീ.1989ല്‍ പുറത്തിറങ്ങിയ ഈ സിനിമയില്‍ സല്‍മാന്‍ ഖാന്റെ നായികയായാണ് ഭാഗ്യശ്രീ അഭിനയിച്ചത്. വിവാഹ ശേഷം വെള്ളിത്തിരയില്‍ നിന്നും വിട്ടുനിന്ന അവര്‍ ടി വി പ്രോഗ്രാമുകളിലൂടെ തിരിച്ചുവരവ് നടത്തിയിരുന്നു. പ്രായം 53 പിന്നിട്ടെങ്കിലും യുവത്വം കാത്തുസൂക്ഷിക്കാന്‍ ഇപ്പോഴും ഇവര്‍ക്കായിട്ടുണ്ട്. ചിട്ടയായ ജീവിതരീതിയും മുടക്കാതെയുള്ള വര്‍ക്കൗട്ടുകളുമാണ് ഇവരെ ഇപ്പോഴും യൗവനയുക്തയായി നിലനിര്‍ത്തുന്നത്. തന്റെ വര്‍ക്കൗട്ട് വീഡിയോകള്‍ സാമൂഹിക മാധ്യമങ്ങളിലൂടെ പങ്കുവെക്കാറുമുണ്ട് ഭാഗ്യശ്രീ.അത്തരത്തില്‍ ഒരു പുതിയ വീഡിയോ ആണ് ഇന്‍സ്റ്റാഗ്രാമില്‍ താരം പങ്കുവെച്ചിരിക്കുന്നത്.
ശരീരത്തിന്റെ വഴക്കം വര്‍ദ്ധിപ്പിക്കുകയും സ്റ്റിഫ്‌നസുമായി ബന്ധപ്പെട്ട പ്രശ്നങ്ങള്‍ ഇല്ലാതാക്കാനും സഹായിക്കുന്ന ലളിതമായ ചില വ്യായാമങ്ങളാണ് പുതിയ വീഡിയോവിലൂടെ നടി പങ്കുവെച്ചിരിക്കുന്നത്.പ്രായവുമായി ബന്ധപ്പെട്ട് ശരീരത്തിന്റെ വഴക്കവും ചലനാത്മകതയും കുറയുകയോ ഇവമൂലം ദൈനംദിന പ്രവര്‍ത്തികളിലേര്‍പ്പെടുമ്പോള്‍ ശരീരഭാഗങ്ങളില്‍ വേദന അനുഭവപ്പെടുകയോ ചെയ്യുന്നവര്‍ക്ക് വഴക്കവും ചലനാത്മകതയും വീണ്ടെടുക്കാനും രക്തചംക്രമണം ത്വരിതപ്പെടുത്താനും ലളിതമായ ഈ വര്‍ക്കൗട്ടുകളിലൂടെ സാധിക്കുമെന്ന് വീഡിയോക്കൊപ്പമുള്ള കുറിപ്പില്‍ ഭാഗ്യശ്രീ പറയുന്നു
‘ഓരോ ദിവസവും ഓരോ വ്യായാമവും ഏകദേശം 10 തവണ ആവര്‍ത്തിച്ച് ചെയ്യുക. നിങ്ങള്‍ക്ക് കാല്‍മുട്ടിന് പ്രശ്നങ്ങളുണ്ടെങ്കില്‍, കാല്‍മുട്ടിന് താഴെ ഒരു പരന്ന തലയിണയോ തൂവാലയോ ഉപയോഗിച്ച് ഈ വ്യായാമങ്ങള്‍ ചെയ്യുക. ശരീരത്തെ ചലിപ്പിക്കുന്നത് മരുന്നിന് തുല്യമാണ് , അതിനാല്‍ ഉദാസീനമായ ജീവിതശൈലി ഇപ്പോള്‍ തന്നെ ഉപേക്ഷിക്കുക’-അവര്‍ കൂട്ടിച്ചേര്‍ത്തു.
ഇടുപ്പിന്റെ(ഹിപ്) ചലനാത്മകതയെ കേന്ദ്രീകരിച്ചുള്ള വ്യായാമങ്ങളാണ് ഭാഗ്യശ്രീ വീഡിയോയില്‍ അവതരിപ്പിച്ചത്. ഹിപ് ത്രസ്റ്റ്, ഹിപ് സ്‌ട്രെച്ച്, സൈഡ് സിറ്റ് തുടങ്ങിയ വര്‍ക്കൗട്ടുകളാണ് ഇവ.
ഈയിടെയായി നിങ്ങള്‍ക്ക് വര്‍ക്കൗട്ട് ചെയ്യാന്‍ മടി തോന്നുന്നുവെങ്കില്‍, ഭാഗ്യശ്രീയുടെ ഇന്‍സ്റ്റാഗ്രാം പ്രൊഫൈലില്‍ നിന്നുള്ള ഫിറ്റ്‌നസ് സംബന്ധിയായ ചില ക്ലിപ്പുകള്‍ ഇവിടെയുണ്ട്, അത് തീര്‍ച്ചയായും നിങ്ങളെ പ്രചോദിപ്പിക്കും.
