കായിക താരങ്ങള്‍ക്ക് പരുക്കുകള്‍ പുതുമയുള്ള കാര്യമല്ല. എന്നാല്‍ ഇത്തരം പരുക്കുകള്‍ അവഗണിച്ചു കൂട .അവക്ക് കൃത്യമായ ചികിത്സ ആവശ്യമാണ്. പല പരുക്കുകളും ഫിസിയോ തെറാപ്പി ചികിത്സയിലൂടെ മാറ്റിയെടുക്കാവുന്നതാണ്. ഫുട്‌ബോള്‍ പോലുള്ള കളികളില്‍ ഏര്‍പ്പെടുന്നവര്‍ക്ക് തുടകള്‍, കണങ്കാല്‍, ലിഗ്മെന്റുകള്‍ക്ക് എന്നിവക്കാണ് പ്രധാനമായും പരുക്കേല്‍ക്കുന്നത്. തുടയിലെ പേശികള്‍ക്ക് ഏല്‍ക്കുന്ന പരുക്കുകള്‍ ഏകദേശം 35 ശതമാനവും കാലിന് ഏല്‍ക്കുന്ന പരുക്കുകള്‍ ഏകദേശം 34 ശതമാനവും എസി എല്‍, പിസി എല്‍ എന്നീ ലിഗ്മെന്റുകള്‍ക്ക് ഏല്‍ക്കുന്ന പരുക്കുകള്‍ ഏകദേശം ഒരു ശതമാനവുമാണ് ലോകത്താകമാനം റിപ്പോര്‍ട്ട് ചെയ്യപ്പെട്ടത്.ഏറ്റവും കൂടുതല്‍ ക്ഷതമേല്‍പ്പിക്കുന്നത് ലിഗ്മെന്റ് ഇഞ്ചുറിയാണ്. മാനസികമായും ശാരീരികമായും സാമ്പത്തികമായും സ്പോര്‍ട്സ് താരത്തെ പ്രയാസപ്പെടുത്താന്‍ ഈ പരുക്ക് കാരണമാകുന്നു. സര്‍ജറിയും അതിനുശേഷമുള്ള ഫിസിയോ തെറാപ്പിയും റിഹാബിലിറ്റേഷനും ഉണ്ടെങ്കില്‍ മാത്രമേ ഇത്തരം പരുക്കേല്‍ക്കുന്നവര്‍ക്ക് പൂര്‍ണ്ണമായും കളിയിലേക്ക് തിരിച്ചുപോകാന്‍ സാധിക്കുകയുള്ളൂ.തുടയിലെ പരുക്കും നിസാരക്കാരനല്ല. ഈ ഇഞ്ചുറിയ്ക്ക് ഫിസിയോ തെറാപ്പിയിലൂടെ ആശ്വാസം ലഭിക്കും. ഏതെല്ലാം രീതിയില്‍ പരുക്ക് വരാതെ തടയാം, പരുക്ക് വന്നുകഴിഞ്ഞാല്‍ അതിനെ എങ്ങനെ മറികടക്കാം എന്ന കാര്യത്തിലും കൃത്യമായ ധാരണയുണ്ടായിരിക്കണം.
ഷോക്ക് വേവ് ചികിത്സ
അക്യൂട്ട് പരുക്കുകള്‍ക്ക് വിശ്രമവും ഐസിങ് ചെയ്യുകയുമാണ് പതിവ്. തുടര്‍ന്ന് നീര് മാറിയതിനുശേഷം ചെറിയ രീതിയില്‍ സ്ട്രച്ചിങ് വ്യായാമങ്ങള്‍ തിരിച്ചുവരവ് സാധിക്കും.ഒരു പരുക്ക് വന്ന് മാറിക്കഴിഞ്ഞാല്‍ വീണ്ടും വരുമ്പോള്‍ എങ്ങനെ പൂര്‍ണ്ണമായി മാറ്റാം എന്നതിനും ഇപ്പോള്‍ മാര്‍ഗമുണ്ട്. അത്യാധുനിക ഷോക്ക് വേവ് ചികിത്സയിലൂടെ പരിഹരിക്കാവുന്നതാണ് ഇത്. ഷോക്ക് വേവ് ഉപയോഗിച്ച് ക്രോണിക് പരുക്കുകള്‍ വരെ മാറ്റിയെടുക്കാന്‍ സാധിക്കും. ഹൈ പ്രഷര്‍ എനര്‍ജി വേവ് ഉപയോഗിച്ച് രക്തചംക്രമണം ത്വരിതപ്പെടുത്തി വേദനയെ മിനിറ്റുകള്‍കൊണ്ട് പൂര്‍ണ്ണമായും സുഖപ്പെടുത്തുന്ന ചികിത്സാരീതിയാണിത്. ഷോള്‍ഡറിനും മസിലുകള്‍ക്കും ഉണ്ടാകുന്ന വേദന മാറ്റാനും ഈ ട്രീറ്റ്മെന്റിലൂടെ സാധിക്കും.ലിഗ്മെന്റിന് വരുന്ന പരുക്കുകള്‍ക്ക് ഓപ്പറേഷനും റീഹാബിലിറ്റേഷനും ആവശ്യമാണ്. കണങ്കാലിന് ഏല്‍ക്കുന്ന പരുക്കുകള്‍ ഗ്രേഡുകള്‍ അടിസ്ഥാനപ്പെടുത്തിയാണ് നിര്‍ണ്ണയിക്കുന്നത്. സാധാരണയായി മൂന്ന് ആഴ്ചത്തെ പ്ലാസ്റ്ററും കണങ്കാലിന് റീഹാബിലിറ്റേഷനും നല്‍കിയാണ് ഇവരെ വീണ്ടും കായിക അധ്വാനത്തിന് പ്രാപ്തമാക്കുന്നത്.
വാം അപ് പ്രധാനം
ഏത് കളിയും മുന്‍പ് വാം അപ് ചെയ്തതിനുശേഷം മാത്രം കളിക്കാന്‍ ആരംഭിക്കുന്നതാണ് നല്ലത്.ഫിഫ 11 എന്ന വാം അപ് പ്രോഗ്രാമനുസരിച്ച് പത്തോ പതിനഞ്ചോ മിനിട്ട് വാം അപ് ചെയ്തതിനുശേഷം കളിക്ക് ഇറങ്ങുന്നതാണ് ഉചിതം. ഇങ്ങനെ ചെയ്താല്‍ ഒരുപരിധി വരെ പരുക്കുകള്‍ ഇല്ലാതാക്കാന്‍ കഴിയും.
