പലകാരണങ്ങളാലും ആളുകള്‍ ഇന്ന് വ്യായാമത്തിന് പ്രധാന്യം കൊടുക്കുന്നുണ്ട്. പ്രായഭേദമന്യേ വിവിധതരം വ്യായാമ പ്രക്രിയകളില്‍ ഏര്‍പ്പെടുന്നവരുടെ എണ്ണം വര്‍ധിച്ചുവരുന്നതായാണ് കാണുന്നത്. ഇതില്‍ പലരും പ്രഭാതമാണ് വ്യായാമത്തിന് തിരഞ്ഞെടുക്കുന്ന സമയം. ഈ സമയങ്ങളില്‍ വ്യായാമത്തില്‍ ഏര്‍പ്പെടുന്നവരുടെ ഒരു പ്രധാന സംശയമാണ് വെറും വയറ്റിലാണോ വ്യായാമം ചെയ്യേണ്ടത് അല്ലങ്കില്‍ എന്തെങ്കിലും കഴിച്ചുവേണോ എന്നുള്ളത്. എന്നാല്‍ ഇതിന് കൃത്യമായ ഒരു ഉത്തരം പലര്‍ക്കും പറയാനുണ്ടാകില്ല. പലരും വിവിിധങ്ങളായ അഭിപ്രായങ്ങളാണ് പങ്കുവെക്കുക.
അതിരാവിലെ ഭക്ഷണം കഴിക്കാതെ വേണം വ്യായാമം ചെയ്യാന്‍ എന്നു പറയുന്നവര്‍ മുഖ്യമായും രണ്ട് കാരണങ്ങളാണ് ചൂണ്ടിക്കാണിക്കുക. ശരീരത്തിലെ കൊഴുപ്പ് ഊര്‍ജ്ജമായി ഉപയോഗിക്കാന്‍ സഹായിക്കുന്ന കോര്‍ട്ടിസോള്‍ രാവിലെ കൂടുതല്‍ അളവിലുണ്ടാവുമെന്നും അത് കൊണ്ട് തന്നെ രാവിലെ വെറും വയറ്റില്‍ വ്യായാമം ചെയ്താല്‍ കൂടുതല്‍ കൊഴുപ്പ് എരിച്ച് കളയപ്പെടും എന്നുള്ളതാണ് ഇതിലൊന്ന്. രണ്ടാമതായി, രാത്രി മുഴുവന്‍ ഭക്ഷണമൊന്നും ലഭിക്കാതെ വരുമ്പോള്‍ ശരീരത്തിന്റെ അടിസ്ഥാന പ്രവര്‍ത്തനങ്ങള്‍ക്കായി ശരീരത്തിലുള്ള ഗ്ലുക്കോസൊക്കെ ഉപയോഗിച്ച് തീരുമെന്നും, അതിനാല്‍ രാവിലെ ഭക്ഷണമൊന്നും കഴിക്കാതെ വ്യായാമം ചെയ്യുന്ന ഒരാളുടെ ശരീരം കൊഴുപ്പ് പരമാവധി ഉപയോഗിക്കപ്പെടുമെന്നുള്ളതാണ്. ഈ രണ്ട് അഭിപ്രായങ്ങളെയും ശരിവെക്കുന്ന നിരവധി പഠനങ്ങളും ഉണ്ട്.
അതേ സമയം ആരോഗ്യകരമായ രീതിയില്‍ ശരീര ഭാരം കുറക്കാനും ഫിറ്റ്‌നസ് വര്‍ധിപ്പിക്കാനുമുള്ള മാര്‍ഗം പെട്ടെന്ന് കൊഴുപ്പ് കത്തിച്ച് കളയലല്ലെന്ന മറുവാദവും ഉയര്‍ന്നുവരുന്നുണ്ട്. ദിവസം മുഴുവനും ശരീരത്തെ ഊര്‍ജസ്വലമായി നിലനിര്‍ത്തുകയും, കത്തിച്ച് കളയുന്ന കലോറിയുടെ അളവ് വര്‍ധിപ്പിക്കുകയും, കൃത്യമായ ഡയറ്റുമാണ് വേണ്ടതെന്നാണ് ഈ രീതിയെ പിന്തുടരുന്നവര്‍ പറയുന്നത്. വെറും വയറ്റില്‍ വ്യായാമം ചെയ്യുന്ന ഒരാള്‍ക്ക് ദിവസത്തില്‍ ബാക്കിയുള്ള സമയത്ത് ശരീരത്തിന്റെ ചയാപചയ പ്രവര്‍ത്തനങ്ങളെ ഉയര്‍ന്ന നിലയില്‍ നിര്‍ത്താനും ഫലപ്രദമായി ഊര്‍ജം കത്തിച്ച് കളയാനും ബുദ്ധിമുട്ടാണ്. വ്യായാമം ചെയ്ത് തുടങ്ങുന്ന ആദ്യത്തെ കുറച്ച് ദിവസങ്ങളില്‍ ഈ വ്യത്യാസം അത്രക്ക് അനുഭവപ്പെടില്ലെങ്കിലും ദീര്ഘകാലാടിസ്ഥാനത്തില്‍ ഇത് ശരീരത്തിന് വളരെ ദോഷം ചെയ്യുമെന്നാണ് പറയുന്നത്.
ശരീര ഭാരം കുറക്കുക എന്ന ഒറ്റ ലക്ഷ്യത്തോടെ പട്ടിണി കിടക്കുകയും അശാസ്ത്രീയമായ വ്യായാമങ്ങള്‍ ചെയ്യുകയും ചെയ്യുന്നത് പേശി നഷ്ടത്തിന് ഇടയാക്കും. വെറും വയറ്റില്‍ വ്യായാമം ചെയ്യുന്ന ഒരാളുടെ ശരീരം ഊര്‍ജ്ജത്തിനായി ആശ്രയിക്കുക പ്രോട്ടീനെ ആയിരിക്കും. ഇത് മസിലിന് കിട്ടേണ്ട പ്രോട്ടീന്‍ അളവിനെ ബാധിക്കുകയും മസിലുകള്‍ നഷ്ടപ്പെടുന്ന അവസ്ഥയിലേക്ക് നയിക്കുകയും ചെയ്യും.
കൊഴുപ്പിനെ ഊര്‍ജ്ജമാക്കി മാറ്റാന്‍ സഹായിക്കുന്ന കോര്‍ട്ടിസോള്‍ രാവിലെയാണ് ശരീരത്തില്‍ കൂടുതല്‍ അളവില്‍ ഉത്പാദിപ്പിക്കപ്പെടുന്നത്. കോര്‍ട്ടിസോള്‍ കൂടുതലുള്ളപ്പോള്‍ വ്യായാമം ചെയ്താല്‍ ശരീരത്തിന് ഉപയോഗിക്കാന്‍ പറ്റുന്നതിലും അധികം ഫ്രീ ഫാറ്റി ആസിഡുകള്‍ ശരീരത്തില്‍ ചംക്രമണം ചെയ്യപ്പെടും. ഈ ഫ്രീ ഫാറ്റി ആസിഡുകള്‍ ഉടന്‍ തന്നെ മസിലുകള്‍ക്ക് ഊര്‍ജ്ജം നല്‍കാനായി ഉപയോഗിക്കപ്പെട്ടില്ലെങ്കില്‍ അത് വയറിന് ചുറ്റും ഫാറ്റ് ഡെപ്പോസിറ്റായി മാറാന്‍ സാധ്യതയുണ്ട്.
ഏതൊരു വ്യായാമം ചെയ്യുമ്പോളും, ശരീരത്തിലെ വിവിധ മസിലുകള്‍ പ്രവര്‍ത്തനക്ഷമമാകുന്നുണ്ട്. അതിനാല്‍ മസിലുകള്‍ക്ക് കാര്‍ബോഹൈഡ്രേറ്റും പ്രോട്ടീനും ആവശ്യമാണ്. വര്‍ക്ക്ഔട്ട് തുടങ്ങും മുന്‍പ് പ്രീ വര്‍ക്ക്ഔട്ട് മീല്‍ പോലുള്ള ഭക്ഷണം കഴിക്കുന്ന വ്യക്തിക്ക് ഈ കാര്‍ബും പ്രോട്ടീനും ആവശ്യത്തിന് ലഭിക്കും, വര്‍ക്കൗട്ട് കൂടുതല്‍ ഫലപ്രദമായി ചെയ്യാനും സാധിക്കുകയും ചെയ്യു. വെറും വയറ്റില്‍ വര്‍ക്കൗട്ട് ചെയ്യുമ്പോള്‍ വര്‍ക്കൗട്ട് ചെയ്യാനുള്ള ഊര്‍ജ്ജം മസിലുകള്‍ക്ക് ശരിയായ രീതിയില്‍ ലഭിക്കാതിരിക്കുകയും, വര്‍ക്കൗട്ടിന്റെ റിസല്‍റ്റ് താരതമ്യേന കുറയുകയും ചെയ്യും.
ആവശ്യത്തിന് ഊര്‍ജ്ജമില്ലാതെ വ്യായാമം ചെയ്യുമ്പോള്‍ കടുത്ത ക്ഷീണവും തലകറക്കവുമൊക്കെ ഉണ്ടാകാനും ഇടയാക്കും. ഇത് ശരീരത്തില്‍ അനാവശ്യമായി സ്‌ട്രെസ്സ് നല്‍കുകയും, പിന്നാലെ പല വിധ പരുക്കുകള്‍ക്ക് ഇടയാക്കുകയും ചെയ്‌തേക്കാം.
വെറും വയറ്റില്‍ വ്യായാമം ചെയ്യരുത് എന്ന് പറഞ്ഞാല്‍ അതിനര്‍ത്ഥം വയറു നിറയെ ആഹാരം കഴിക്കുക എന്നല്ല. ഒരു തുടക്കം എന്ന നിലയില്‍, രണ്ട് ബിസ്‌കറ്റോ, കുക്കീസോ, വാഴപ്പഴമോ, ഒരു ആപ്പിളോ ഒക്കെ കഴിച്ച് ഒപ്പം ഒരു ഗ്ലാസ് വെള്ളമോ കാപ്പിയോ ഒക്കെ കുടിച്ചാലും ധാരാളമാണ്. ഭക്ഷണം കഴിക്കുമ്പോള്‍ അസ്വസ്ഥത തോന്നുന്നുണ്ടെങ്കില്‍ തുടക്കത്തില്‍ വെള്ളം മാത്രം കുടിച്ചും, പിന്നീട് വളരെ ചെറിയ അളവില്‍ ഭക്ഷണം ഉള്‍പ്പെടുത്തിയും ശ്രമിക്കാം. പതിയെ ഏതാനും ആഴ്ചകള്‍ എടുത്ത് ശരിയായ പ്രീ വര്‍ക്കൗട്ട് മീലിലേക്ക് മാറുകയും ചെയ്യാം. ചുരുക്കി പറഞ്ഞാല്‍, സാധ്യമാവുമ്പോഴെല്ലാം കൃത്യമായ ഭക്ഷണം കഴിച്ചതിനു ശേഷം വ്യായാമം ചെയ്യുന്നത് തന്നെയാണ് എല്ലായ്പ്പോഴും നല്ലത്.
