മധ്യവയസിലെത്തുന്നതോടെ തന്നെ ജീവിത രീതികളില്‍ പല മാറ്റങ്ങളും വരുത്തുന്നവരാണ് നമ്മളില്‍ പലരും. പതിവ് വ്യായാമങ്ങളും ചിട്ടയായ ഭക്ഷണ ശീലങ്ങളും നമ്മളില്‍ പലരും വേണ്ടെന്നു വെക്കും. ഇതോടെ പടിക്കു പുറത്തു നിന്നിരുന്ന പല രോഗങ്ങളും ശരീരത്തെ ആക്രമിച്ച് തുടങ്ങുകയും ചെയ്യും. എന്നാല്‍ ഫിറ്റ്‌നസിന്റെ കാര്യത്തിലും പോഷകസമ്പുഷ്ടമായ ഭക്ഷണ ശീലത്തിന്റെ കാര്യത്തിലും വിട്ടുവീഴ്ച നടത്താതെ ആരോഗ്യകരമായ ജീവിതം മുന്നോട്ടു കൊണ്ടുപോകുന്ന പലരും നമുക്ക് മുന്നിലുണ്ട്. ഇത്തരക്കാര്‍ പുതിയ തലമുറയെപ്പോലും പ്രചോദിപ്പിച്ചു കോണ്ടേയിരിക്കും. അത്തരം ഒരാളെക്കുറിച്ചാണ് ഇവിടെ പറയുന്നത്. കാനഡക്കാരനാണ് കക്ഷി. പേര് ടോണി ഹെല്യു. പ്രായം എഴുപത്തിയഞ്ചു ആയെങ്കിലും യുവാക്കളെ വെല്ലുന്ന രീതിയിലാണ് തന്റെ ഫിറ്റ്നസ് ടോണി ഹെല്യു എന്ന മുത്തച്ഛന്‍ കാത്തുസൂക്ഷിക്കുന്നത്.ഇതിന്റെ പേരില്‍ ഇപ്പോള്‍ ഒരു ലോക റെക്കോര്‍ഡും സ്വന്തമാക്കിയിരിക്കുകയാണ് കക്ഷി. കാനഡയിലെ ഡ്യൂക്സ് മൊണ്ടാജെന്‍സ് ആണ് ടോണിയുടെ സ്വദേശം. ഹെഡ്സ്റ്റാന്‍ഡ് ചെയ്യുന്ന ലോകത്തിലെ ഏറ്റവും പ്രായം കൂടിയ വ്യക്തിക്കുള്ള ഗിന്നസ് റെക്കോര്‍ഡാണ് ടോണി നേടിയിരിക്കുന്നത്.
വളരെ അനായാസമായി ടോണി ഹെഡ്സ്റ്റാന്‍ഡ് ചെയ്യുന്ന വീഡിയോ ഗിന്നസ് ലോക റെക്കോര്‍ഡ്സ് തന്നെയാണ് സമൂഹികമാധ്യമങ്ങളില്‍ പങ്കുവച്ചത് .ഈ പ്രായത്തിലും ഫിറ്റ്നസ് കാത്തുസൂക്ഷിക്കാനുണ്ടായ പ്രചോദനമെന്താണെന്ന് ചോദിച്ചാല്‍ അത് കുടുംബമാണെന്നാണ് ടോണിയുടെ ഉത്തരം. എന്നുമാത്രമല്ല, ഏത് പ്രായത്തിലും ആരോഗ്യത്തോടെയിരിക്കാന്‍ സാധിക്കുമെന്നത് ഏവരെയും ബോധ്യപ്പെടുത്തുക എന്നത് കൂടി തന്റെ ലക്ഷ്യമായിരുന്നുവെന്നും ടോണി പറയുന്നു.
അമ്പത്തിയഞ്ചാം വയസിലാണ് ടോണി തന്റെ ഫിറ്റ്നസ് യാത്ര ആരംഭിക്കുന്നത്. ഓട്ടം, പുഷ് അപ്സ് തുടങ്ങിയ വര്‍ക്കൗട്ടുകളാണ് ടോണി തുടര്‍ന്നുവരുന്നത്. അതിരാവിലെ ഉണര്‍ന്ന് ഓട്ടം. ഇതിന് ശേഷം കാപ്പി. അതും കഴിഞ്ഞ് പുഷ് അപ്സ്- ഹെഡ്സ്റ്റാന്‍ഡ്. ഇതാണ് ടോണി പിന്തുടര്‍ന്നു വരുന്ന വര്‍ക്കൗട്ട് രീതി. .ഇപ്പോള്‍ ലഭിച്ച അംഗീകാരം വാര്‍ധക്യത്തിലെ ഫിറ്റ്നസുമായി ബന്ധപ്പെട്ട് താന്‍ മറ്റുള്ളവര്‍ക്ക് നല്‍കാന്‍ ലക്ഷ്യമിട്ടിരുന്ന സന്ദേശത്തെ എളുപ്പത്തില്‍ എത്തിക്കുന്നതാണെന്നും അതില്‍ സന്തോഷമുണ്ടെന്നുമാണ് ടോണി പറഞ്ഞുവെക്കുന്നു
വാല്‍ക്കഷ്ണം: ഹെഡ്സ്റ്റാന്‍ഡ് ശരിയായ രീതിയില്‍ ചെയ്തില്ലെങ്കില്‍ തലക്കും കഴുത്തിനും മാരക പരുക്കുകള്‍ സംഭവിക്കാനുള്ള സാധ്യതയുണ്ട്. ഇക്കാരണത്താല്‍ തന്നെ യുവാക്കളോ പ്രൊഫഷണലുകളോ ആണ് ഈ വ്യായാമ രീതി ചെയ്തു വരുന്നുത്. 60-70 പ്രായത്തിലുള്ളവര്‍ക്ക് ഒട്ടും അഭികാമ്യമല്ല ഹെഡ്സ്റ്റാന്‍ഡ് എന്ന് വിദഗ്ധര്‍ പറയുന്നു
