തെലുങ്ക്, കന്നഡ ചലച്ചിത്ര താരമായ രശ്മിക മന്ദാനക്ക് മലയാളത്തിലും ആരാധകര്‍ കുറവല്ല. മികച്ച അഭിനേത്രികൂടിയായ ഇവര്‍ ആരോഗ്യത്തിനും ഫിറ്റ്‌നസിനും ഏറെ പ്രധാന്യം കൊടുക്കുന്നു. അതിതീവ്ര വ്യായാമ രീതികളാണ് രശ്മികയുടേത്. ജിമ്മില്‍ പലപ്പോഴും ബീസ്റ്റ് മോഡിലാണ് താരത്തിന്റെ വര്‍ക്കൗട്ട്. രശ്മികയുടെ ഫിറ്റ്നസ് പ്രേമത്തിന് തെളിവാണ് അവരുടെ ഇന്‍സ്റ്റാഗ്രാം പ്രൊഫൈല്‍.താരത്തിന്റെ ഇന്‍സ്റ്റാഗ്രാം പ്രൊഫൈല്‍ വര്‍ക്ക്ഔട്ട് ഡയറികളില്‍ നിന്നുള്ള ദൃശ്യങ്ങള്‍ കൊണ്ട് നിറഞ്ഞിരിക്കുന്നു, കൂടാതെ ഫിറ്റ്‌നസിനായി താരത്തിനുള്ള അര്‍പ്പണബോധം ഇതില്‍ തെളിഞ്ഞു കാണാം.
കിക്ക്ബോക്സിംഗ് ഏറെ ഇഷ്ടപ്പെടുന്ന രശ്മികയുടെ പരിശീലന സെഷനില്‍ നിന്നുള്ള ഒരു വീഡിയോ ഇന്‍സ്റ്റാഗ്രാം പ്രൊഫൈലില്‍ ഇടംപിടിച്ചു. കടുത്ത ദേഷ്യം വരുമ്പോള്‍ ഞാന്‍ എന്താണ് ചെയ്യുന്നത് എന്ന് നോക്കു എന്ന അടിക്കുറിപ്പോടെയാണ് താരം വീഡിയോ പോസ്റ്റ് ചെയ്തിരിക്കുന്നത്.
വീഡിയോയില്‍, ഫിറ്റ്നസ് പരിശീലകന്‍ സ്ട്രൈക്കിംഗ് പാഡ് പിടിച്ചു നില്‍ക്കുന്നതും രശ്മിക ആവര്‍ത്തിച്ച് കിക്കുകള്‍ ചെയ്യുന്നതും കാണാം. അതേസമയം അവളുടെ പരിശീലകന്‍ കൂടുതല്‍ ശക്തമായി കിക്ക് ചെയ്യുവാന്‍ താരത്തെ പ്രേരിപ്പിക്കുന്നതും വീഡിയോവിലുണ്ട്.
കിക്ക്‌ബോക്‌സിംഗിന്റെ നേട്ടങ്ങള്‍ അറിയുക
1. സമ്മര്‍ദ്ദം കുറയ്ക്കുന്നു
ഹൈ എനര്‍ജി വര്‍ക്കൗട്ടായ കിക്ക്‌ബോക്‌സിങ് ചെയ്യുന്നത് വഴി ശരീരത്തിലെ സമ്മര്‍ദം ഒരു പരിധി വരെ കുറയ്ക്കാന്‍ കഴിയും. നിരവധി വിദഗ്ധര്‍ അംഗീകരിച്ചിട്ടുള്ള കാര്യമാണിത്. അതുകൊണ്ടുതന്നെ നിങ്ങളുടെ മനസ്സിനെ എന്തെങ്കിലും അസ്വസ്ഥതകളോ ദേഷ്യമോ ഉള്ളപ്പോള്‍ ഒക്കെ മനസ്സിനെ ശാന്തമാക്കാന്‍ ചെയ്യാന്‍ കഴിയുന്ന വ്യായാമങ്ങളില്‍ ഒന്നാണ് ഇത്. കിക്ക്ബോക്സിംഗിലെ ചലനങ്ങള്‍ ശരീരത്തിലെ നിരവധി പ്രധാന പേശികള ഉത്തേജിപ്പിക്കുകയും ശരീരത്തിന് മൊത്തത്തിലുള്ള വ്യായാമം അതി വേഗത്തില്‍ നല്‍കുകയും ചെയ്യും.
2. ആത്മവിശ്വാസം വര്‍ദ്ധിപ്പിക്കുന്നു
മാനസികാരോഗ്യ വിദഗ്ധര്‍ പറയുന്നതനുസരിച്ച്, കിക്ക്ബോക്സിംഗ് എന്ന ഈയൊരു വര്‍ക്കൗട്ട് ഒരാളുടെ ശരീരത്തില്‍ എന്‍ഡോര്‍ഫിന്‍ ഹോര്‍മോണുകളെ പുറത്തുവിടാന്‍ സഹായിക്കുന്നു, ഇത് നിങ്ങളുടെ മാനസികാവസ്ഥയെ ഉത്തേജിപ്പിച്ച് കൂടുതല്‍ ആത്മവിശ്വാസം നേടിയെടുക്കാന്‍ സഹായിക്കുകയും ചെയ്യുന്നതാണ്. അതുകൊണ്ടുതന്നെ ഈ വ്യായാമത്തിന് ശേഷം ലഭിക്കുന്ന എന്‍ഡോര്‍ഫിന്‍സ് മണിക്കൂറുകളോളം നിങ്ങളില്‍ സന്തോഷവും പോസിറ്റീവിറ്റിയും നിറക്കും.
3. മെച്ചപ്പെട്ട ഏകോപനം
കുറച്ചുനാള്‍ ഇത് പരിശീലിക്കുന്നതിലൂടെ നിങ്ങളുടെ വയറിലെ പേശികള്‍ ശക്തിപ്പെടുത്താനും നിങ്ങളുടെ റിഫ്‌ലെക്‌സുകളും ഏകോപന കഴിവുകളും മെച്ചപ്പെടുത്താനും നിങ്ങള്‍ക്ക് കഴിയും. കിക്ക്ബോക്സിംഗിലെ വേഗത്തിലുള്ള പഞ്ചുകളും കിക്കുകളും ഓരോ ചലനങ്ങള്‍ പോലും വിജയകരമായി പൂര്‍ത്തീകരിക്കാനും വീണ്ടും നിങ്ങള്‍ക്ക് ആവശ്യമായ ഊര്‍ജ്ജം കേന്ദ്രീകരിക്കാനുമുള്ള അവസരം ഇത് നല്‍കും.
4. ഉയര്‍ന്ന അളവില്‍ കലോറി എരിച്ച് കളയാം
കിക്ക്ബോക്സിംഗിന് ഒരാളുടെ ശരീരത്തില്‍ നിന്ന് മണിക്കൂറില്‍ 800 കലോറി വരെ കത്തിച്ചുകളയാന്‍ കഴിയുമെന്ന് മസില്‍ ആന്‍ഡ് ഫിറ്റ്നസ് മാഗസിന്‍ റിപ്പോര്‍ട്ട് ചെയ്യുന്നു. ശരീരത്തില്‍ നിന്ന് അനാവശ്യ കലോറികള്‍ പുറത്തു പോകുന്നത് അമിതഭാരം കുറയ്ക്കാനും നിങ്ങളുടെ മെറ്റബോളിസത്തെ പുനരുജ്ജീവിപ്പിക്കാനും സഹായിക്കും. ശരീരഭാരം വേഗത്തില്‍ കുറയക്കാന്‍ കഴിയുന്ന പവര്‍ കാര്‍ഡിയോ ദിനചര്യയാണിത്.
5. ഐഡിയല്‍ ക്രോസ്-ട്രെയിനിംഗ് വര്‍ക്ക്ഔട്ട്
നിങ്ങള്‍ ആഴ്ചകളോളം ട്രെഡ്മില്ലില്‍ അല്ലെങ്കില്‍ റണ്ണിങ് വ്യായാമങ്ങള്‍ മാത്രം ചെയ്തു മടുത്തെങ്കില്‍ നിങ്ങളുടെ സാധാരണ കാര്‍ഡിയോ ദിനചര്യയില്‍ നിന്ന് ഒരു ഇടവേള എടുത്തുകൊണ്ട് ചെയ്യാന്‍ കഴിയുന്നതാണ് കിക്ക്ബോക്സിംഗ്. അതുകൊണ്ടുതന്നെ ഏറ്റവും മികച്ച ക്രോസ്-ട്രെയിനിംഗ് വര്‍ക്ക്ഔട്ടായി ഇത് പരിഗണിക്കാം. ആഴ്ചയില്‍ ഒന്നോ രണ്ടോ തവണ മാത്രം ഇത് ചെയ്താല്‍ മതിയാവും. ശരീരത്തില്‍ വേഗത്തില്‍ മാറ്റങ്ങള്‍ കണ്ടു തുടങ്ങാന്‍ ഇത് നിങ്ങളെ സഹായിക്കും.
6. എനര്‍ജി ബൂസ്റ്റര്‍
നിങ്ങളുടെ ശരീരത്തിനും മനസ്സിനും ഉത്തേജനം നല്‍കുന്ന ഉയര്‍ന്ന ഊര്‍ജ്ജമുള്ള കാര്‍ഡിയോ ദിനചര്യയാണ് കിക്ക്ബോക്സിംഗ്. വളരെ വേഗത്തില്‍ ഇത് നിങ്ങളുടെ ഊര്‍ജ്ജ നില വര്‍ദ്ധിപ്പിക്കും. ഇത് ചെയ്യുമ്പോള്‍ നിങ്ങള്‍ വേഗത്തിലും ആഴത്തിലും ദീര്‍ഘമായി ശ്വസിക്കുന്നത് വഴി ശ്വാസസംബന്ധമായ പ്രശ്‌നങ്ങള്‍ ഒരു പരിധി വരെ അകറ്റി നിര്‍ത്താന്‍ കഴിയും എന്ന് പറയപ്പെടുന്നു. ശരീരത്തെ പെട്ടെന്ന് വിയര്‍ക്കാന്‍ അനുവദിക്കുന്ന ഒരു വര്‍ക്കൗട്ട് കൂടിയാണിത്. ശരീരത്തിലെ വിഷവസ്തുക്കളെ വിയര്‍പ്പിലൂടെ പുറന്തള്ളാന്‍ ഈ പ്രക്രിയ സഹായിക്കും.
7. മെച്ചപ്പെട്ട പോസ്ചര്‍
നിങ്ങള്‍ ദിവസം മുഴുവനും ഒരു കമ്പ്യൂട്ടറിന് മുന്നിലിരുന്ന് ജോലി ചെയ്യുന്നവരാണെങ്കില്‍ ശാരീരിക ആകൃതി അത്ര മികച്ചതായിരിക്കില്ല. ഇരുന്നുകൊണ്ട് ജോലി ചെയ്യുന്നത് കൊണ്ട് തന്നെ പ്രത്യേകിച്ചു നിങ്ങളുടെ വയറിന്റെ ഇരു ഭാഗത്തും കൊഴുപ്പുകള്‍ അടിഞ്ഞു കൂടാനുള്ള സാധ്യതയും കൂടും. കിക്ക്ബോക്സിംഗ് വര്‍ക്ക്ഔട്ടുകള്‍ കോര്‍ ഭാഗത്തെ ഫോക്കസ് ചെയ്തുകൊണ്ടുള്ളതാണ്. അതുകൊണ്ടുതന്നെ നിങ്ങളുടെ വയറിലെ ഭാഗത്തിന് ചുറ്റുമുള്ള കോര്‍ പേശികളെ കിക്ക്ബോക്സിംഗ് പ്രത്യേകിച്ചും ലക്ഷ്യമിടുന്നു. കാരണം ഈ വ്യായാമത്തില്‍ ഏര്‍പ്പെടുമ്പോള്‍ നിങ്ങളുടെ അരക്കെട്ടും വയറും സന്തുലിതമായി ഉപയോഗിക്കേണ്ടതുണ്ട്. അതുകൊണ്ടുതന്നെ എളുപ്പത്തില്‍ ഇത്തരം കൊഴുപ്പുകള്‍ നീക്കം ചെയ്തുകൊണ്ട് മെച്ചപ്പെട്ട പോസ്ചര്‍ നേടിയെടുക്കാന്‍ കഴിയും.
കിക്ക്ബോക്സിംഗ് വര്‍ക്കൗട്ടുകള്‍ നിങ്ങളുടെ ശരീരത്തിനും മനസ്സിനും നിരവധി നേട്ടങ്ങള്‍ നല്‍കുന്ന ഒന്നാണ്. നിങ്ങളുടെ സാധാരണ ദൈനദിന ഫിറ്റ്നസ് രീതികളില്‍ നിന്നും മാറി പുതുതായി എന്തെങ്കിലും പരീക്ഷിക്കാന്‍ ആഗ്രഹിക്കുന്നുണ്ടെങ്കില്‍ മികച്ച തിരഞ്ഞെടുപ്പുമാണ് കിക്ക് ബോക്‌സിംഗ്.
