40 വയസ് പിന്നിട്ട് കഴിഞ്ഞാല്‍ പിന്നീടുള്ള ഓരോ ദശാബ്ദത്തിലും നമുക്ക് 8 ശതമാനം വരെ പേശി(muscle mass) നഷ്ടമുണ്ടാകുമെന്നാണ് കണക്കാക്കിയിരിക്കുന്നത്. 70 വയസ്സിനു ശേഷം പേശി നഷ്ടമുണ്ടാകുന്നതിന്റെ വേഗത ഇരട്ടിയാകും. സാര്‍കോപീനിയ അല്ലെങ്കില്‍ വിപുലമായ പേശി നഷ്ടം, 50 വയസ്സിനു മുകളിലുള്ളവരില്‍ മൂന്നിലൊന്നിനെ സാരമായി ബാധിക്കുന്നുവെന്നും കണ്ടെത്തിയിട്ടുണ്ട്.
അവയവങ്ങളുടെ പ്രവര്‍ത്തനം, ചര്‍മ്മത്തിന്റെ ആരോഗ്യം, പ്രതിരോധശേഷി, ഉപാപചയ പ്രവര്‍ത്തനങ്ങള്‍ എന്നിവ തുടങ്ങി സാധാരണ ശാരീരിക പ്രവര്‍ത്തനങ്ങള്‍ക്കും പേശികള്‍ നിര്‍ണായകമാണ്.മറ്റൊരു വിധത്തില്‍ പറഞ്ഞാല്‍, നിങ്ങള്‍ക്ക് പ്രായമാകുമ്പോള്‍ പേശികളുടെ അളവ് നിലനിര്‍ത്തുന്നത് സന്തോഷകരവും ആരോഗ്യകരവുമായ ജീവിതം നയിക്കാന്‍ അത്യന്താപേക്ഷിതമാണ്.
‘പേശി നഷ്ടം വളരെ അപൂര്‍വ്വമായി ചര്‍ച്ച ചെയ്യപ്പെടുന്ന ഒരു വാര്‍ദ്ധക്യ ഘടകമാണ്, വാര്‍ദ്ധക്യത്തിന്റെ സ്വാഭാവിക മാറ്റമായി ശക്തിയും ഊര്‍ജ്ജവും നഷ്ടപ്പെടുന്നതായി ആളുകള്‍ അംഗീകരിക്കുന്നു, അബോട്ട് ന്യൂട്രീഷന്റെ മെഡിക്കല്‍ ആന്‍ഡ് സയന്റിഫിക് അഫയേഴ്‌സ് അസോസിയേറ്റ് ഡയറക്ടര്‍ ഗണേഷ് കാദെ പറയുന്നു.എന്നിരുന്നാലും, പ്രായമാകുന്തോറും നമ്മള്‍ എത്രമാത്രം സജീവമായും സ്വതന്ത്രമായും തുടരുമെന്ന് പലപ്പോഴും പേശികളുടെ ഫിറ്റ്‌നസിന് നോക്കി പ്രവചിക്കാന്‍ കഴിയുമെന്നും ഗണേഷ് കാദെ പറഞ്ഞുവെക്കുന്നു
പ്രായമാകുമ്പോള്‍ പേശീ നഷ്ടം ഒഴിച്ച് കൂടാനാകാത്തതാണെങ്കിലും ഉചിതമായ മുന്‍കരുതലുകള്‍ എടുക്കുന്നതിലൂടെ നിങ്ങള്‍ക്ക് പേശികളുടെ നഷ്ടത്തെ തടയാനോ കാലതാമസം വരുത്താനോ കഴിയും
നിങ്ങളുടെ പ്രായത്തിനനുസരിച്ച് ഊര്‍ജസ്വലമായി ഇരിക്കാനും പേശികളെ വരും വര്‍ഷങ്ങളില്‍ ഫിറ്റാക്കി നിലനിര്‍ത്താനും ഈ ടിപ്‌സുകള്‍ പിന്തുടരുക
1. പേശികളും ശക്തിയും നിലനിര്‍ത്താന്‍ വീട്ടില്‍വെച്ച് തന്നെ ചെയ്യാവുന്ന പുഷ് അപ് പോലുള്ള റെസിസ്റ്റന്‍സ് ട്രെയിനിങ് വ്യായാമങ്ങള്‍ പതിവായി ചെയ്യുക.
2. പ്രോട്ടീന്‍ സമ്പന്നമായ മാംസം, മുട്ട, ബീന്‍സ് എന്നിവ ഭക്ഷണത്തില്‍ ഉള്‍പ്പെടുത്തുക. ഓരോ തവണണയിലെ ഭക്ഷണത്തിലൂടെയും 25-30 ഗ്രാം പ്രോട്ടീന്‍ ശരീരത്തില്‍ എത്താന്‍ ശ്രദ്ധിക്കുക
3. പച്ചക്കറികള്‍, പഴങ്ങള്‍, ധാന്യങ്ങള്‍, പ്രോട്ടീനുകള്‍, ആരോഗ്യകരമായ കൊഴുപ്പുകള്‍, കാത്സ്യം, വിറ്റാമിന്‍ ഡി തുടങ്ങിയ പ്രധാന വിറ്റാമിനുകളും ധാതുക്കളും നിറഞ്ഞ സമീകൃതാഹാരം തിരഞ്ഞെടുക്കുക.
4. പേശികളുടെ ആരോഗ്യത്തിന് ആവശ്യമായ മറ്റ് സപ്ലിമെന്റുകളും പരിഗണിക്കുക.
5. നിങ്ങള്‍ ഏതെങ്കിലും തരത്തിലുള്ള രോഗബാധിതനാണെങ്കില്‍ പോഷകാഹാരത്തെക്കുറിച്ച് വിദഗ്ധരുടെ സേവനം തേടുക.
