ഏത് പ്രായക്കാര്‍ക്കും ഏത് രോഗമുള്ളവര്‍ക്കും കഴിക്കാന്‍ പൊതുവെ ശുപാര്‍ശ ചെയ്യുന്ന ഒന്നാണ് ഓട്സ്. ശരീര ഭാരം കുറക്കാന്‍ ആഗ്രഹിക്കുന്ന പലരും ഓട്സ് ഭക്ഷണത്തില്‍ ഉള്‍പ്പെടുത്താറുണ്ട്. യൂറോപ്യന്‍ നാടുകളിലും അമേരിക്കന്‍ നാടുകളിലും ധാരാളമായി കണ്ടുവരുന്ന ഒരു ധാന്യമാണ് ഇത്. ധാരാളം ആരോഗ്യഗുണങ്ങളുള്ള ഓട്സില്‍ വൈറ്റമിനുകള്‍, മിനറല്‍, ആന്റിക്സിഡന്റ് എന്നിവയും നാരുകളുമുണ്ട്. ഇവയില്‍ സോഡിയം നന്നെ കുറവാണ്.ഓട്സില്‍ കൂടുതല്‍ എനര്‍ജി കിട്ടുന്നത് കാര്‍ബോഹൈഡ്രേറ്റില്‍ നിന്നാണ്. 66% കാര്‍ബോഹൈഡ്രേറ്റ് അടങ്ങിയിട്ടുള്ള ഓട്സില്‍ 11% വും നാരുകളാണ്. ഓട്സിന്റെ ഒട്ടുമിക്ക ഗുണങ്ങള്‍ക്കും കാരണം ഇവയിലെ നാരുകളില്‍ ഒന്നായ ബീറ്റ ഗ്ലൂക്കനാണ്. ദഹനത്തെ ത്വരിതപ്പെടുത്തി വിശപ്പുമാറിയെന്ന തോന്നല്‍ ഉണ്ടാക്കാന്‍ ഓട്സിന് കഴിയുമെന്നതിനാല്‍ ഫിറ്റ്നസ് ഫ്രീക്കുകളായ പലരുടേയും ഇഷ്ട വിഭവമാണിത്. ബീറ്റ ഗ്ലൂക്കന് ജെല്‍ പോലെയുള്ള സൊല്യൂഷന്‍ ഉണ്ടാക്കാനുള്ള കഴിവാണ് അമിത വിശപ്പിനെ അകറ്റുന്നത്. ഓട്സ് ധാന്യത്തില്‍ 2.3 85% വരെ ബീറ്റ ഗ്ലൂക്കന് അടങ്ങിയിട്ടുണ്ട്.ബീറ്റ ഗ്ലൂക്കന് കൊളസ്ട്രോള്‍ നിയന്ത്രിക്കാനുള്ള കഴിവുമുണ്ട്
എന്നാല്‍, ഏതു തരം ഓട്സ് തിരഞ്ഞെടുക്കണം എന്നും അത് ഏതൊക്കെ രീതിയില്‍ പാകം ചെയ്യുമ്പോഴാണ് നമ്മുടെ ആരോഗ്യത്തിന് ഗുണപ്രദമാകുന്നത് എന്നും അറിഞ്ഞിരിക്കേണ്ടത് അനിവാര്യമാണ്.ഓട്സിനെ പ്രധാനമായും നാലായി തരം തിരിക്കാം. ഇന്‍സ്റ്റന്റ് ഓട്സ്, റോള്‍ഡ് ഓട്സ്, സ്റ്റീല്‍കട്ട് ഓട്സ്, ഹോള്‍ ഗ്രോട്ട് ഓട്സ്
1. ഇന്‍സ്റ്റന്റ് ഓട്സ്
ഏറെ പ്രോസസ് ചെയ്തതും തവിട് കുറവുള്ളതുമാണ്. എന്നാല്‍ അവയാണ് നമ്മുടെ വിപണിയില്‍ അധികമായി ലഭിക്കുന്നതും പാചകം ചെയ്യാന്‍ എളുപ്പമുള്ളതും.
2. റോള്‍ഡ് ഓട്സ്
മീഡിയം ലെവലില്‍ പ്രോസസ് ചെയ്‌തെടുക്കുന്നതാണ് റോള്‍ഡ് ഓട്സ്.ഇന്‍സ്റ്റന്‍ഡ് ഓട്‌സുമായി താരതമ്യം ചെയ്യുമ്പോള്‍ ഇതിന് പോഷകമൂല്യം കൂടുതലാണ്.
3. സ്റ്റീല്‍ കട്ട് ഓട്‌സ്ഗ്രോട്ട് ഓട്സ്
മൂര്‍ച്ചയുള്ള ബ്ലേഡ് ഉപയോഗിച്ച് മുറിക്കുമ്പോള്‍ ഐറിഷ് ഓട്സ് എന്നും അറിയപ്പെടുന്ന സ്റ്റീല്‍ കട്ട് ഓട്സ് ലഭിക്കുന്നു. സ്റ്റീല്‍ കട്ട് ഓട്സ് പോഷകങ്ങളാല്‍ സമ്പുഷ്ടമാണ്. മറ്റ് രണ്ടുതരം ഓട്‌സിനെക്കാളും നാരിന്റെ അംശം ഇതില്‍ കൂടുതല്‍ അടങ്ങിയിരിക്കുന്നു.
4. ഹോള്‍ ഗ്രോട്ട് ഓട്സ്
പ്രോസസ് ചെയ്യാത്ത ഏറ്റവും കൂടുതല്‍ പ്രോട്ടീനും തവിടും അടങ്ങിയിരിക്കുന്ന പോഷകസമൃദ്ധമായ ഓട്‌സാണ് ഹോള്‍ ഗ്രോട്ട് ഓട്സ്. തൊണ്ട് നീക്കംചെയ്ത മുഴുവന്‍ പരിപ്പാണ് ഗ്രോട്ട്‌സ്. അത് പാചകം ചെയ്യാന്‍ കൂടുതല്‍ സമയമെടുക്കുന്നതുമാണ്. ഗ്രോട്ട് ഓട്സ് ദഹന സമയം വൈകിപ്പിക്കുകയും വിശപ്പ് നിയന്ത്രിക്കുകയും ചെയ്യുന്നു. കൂടാതെ, രക്തത്തിലെ പഞ്ചസാരയുടെ അളവ് വര്‍ധിക്കുന്നത് തടയുന്നു.തവിടോടു കൂടി ഓട്സ് കഴിക്കുമ്പോഴാണ് പൂര്‍ണമായും അതിന്റെ പോഷക ഗുണങ്ങള്‍ ലഭിക്കുക. അതിനാല്‍ ഇനി തിരഞ്ഞെടുക്കുമ്പോള്‍ നിങ്ങളുടെ ആരോഗ്യത്തിന് അനുയോജ്യമായ ഓട്സ് തിരഞ്ഞെടുക്കുക.
ഓട്സ് പാചകം ചെയ്യുമ്പോള്‍
സാധാരണയായി എല്ലാവരും ഓട്സ് പാലിലോ വെള്ളത്തിലോ കുറുക്കി കഴിക്കുന്നതാണ് ശീലം. എന്നാല്‍ ഇങ്ങനെ കുറുക്കി കഴിക്കുമ്പോള്‍ ഇതിന്റെ ഗ്ലൈസീമിക് ഇന്ഡക്സ് ഉയരുന്നു. ഭക്ഷണത്തില്‍ നിന്നും നമ്മുടെ ശരീരം എത്ര വേഗത്തില്‍ ഷുഗറിനെ അഥവാ കാര്‍ബോഹൈഡ്രേറ്റിനെ വലിച്ചെടുക്കുന്നു എന്നതിന്റെ അളവാണ് ഗ്ലൈസീമിക് ഇന്ഡക്സ്. ഓട്സ് സാധാരണയായി ഗ്ലൈസീമിക് ഇന്ഡക്സ് വളരെ കുറവുള്ള ഒരു ഭക്ഷണ പദാര്‍ഥമാണ്. എന്നാല്‍, ഓട്സ് കുറുക്കി കഴിക്കുമ്പോള്‍ ഗ്ലൈസീമിക് ഇന്ഡക്സ് ഉള്ള ഒരു ഭക്ഷണമായി അത് മാറുന്നു. അതിനാല്‍ കുറുക്കിയ രൂപത്തില്‍ ഓട്സ് കഴിക്കുന്നത് പ്രമേഹരോഗികള്‍ക്കും അമിതവണ്ണം ഉള്ളവര്‍ക്കും അനുയോജ്യമായിരിക്കില്ല. അതുകൊണ്ട് ഓട്സ് എപ്പോഴും പലതരം വിഭവങ്ങളായി പാകം ചെയ്യുന്നതായിരിക്കും ഉത്തമം. ഓട്സ് കൊണ്ടുള്ള ഇഡ്ഡലി, ദോശ, പുട്ട്, ഉപ്പുമാവ് ഇവയെല്ലാം പ്രഭാതഭക്ഷണമായി ഉള്‍പ്പെടുത്താവുന്നതാണ്.
