വേഗവും ശക്തിയും വര്‍ധിപ്പിക്കാനുള്ള അതി തീവ്ര പരിശീലനങ്ങളാണ് പ്ലയോമെട്രിക് പരിശീലനങ്ങള്‍. ഈ പരിശീലനങ്ങളിലൂടെ പേശികള്‍ അയയുകയും പേശീ ചലനങ്ങള്‍ വേഗത്തിലാക്കുകയും ചെയ്യുന്നു. പ്ലയോമെട്രിക് വ്യായാമം തുടര്‍ച്ചയായി, ശരിയായ രീതിയില്‍ ചെയ്യുന്ന ഒരാള്‍ക്ക് വേഗത്തില്‍ ഓടാനും, ഉയരത്തില്‍ ചാടാനും, ശക്തിയായി ഇടിക്കാനും, ദൂരത്തിലേക്ക് എറിയാനുമെല്ലാം സാധിക്കുന്നു.
പ്ലയോമെട്രിക് വ്യായാമങ്ങള്‍ക്ക് രണ്ട് ഘട്ടങ്ങളാണ് ഉള്ളത്. ലെങ്തനിംഗ് ഘട്ടവും സ്ട്രെച്ചിംഗ്- ഷോര്‍ട്ടനിംഗ് ഘട്ടവും. ലെങ്തനിംഗ് ഘട്ടത്തില്‍ നിങ്ങളുടെ പേശീകള്‍ റബ്ബര്‍ ബാന്‍ഡ് പോലെ വികസിക്കുകയും ഉടന്‍ തന്നെ ചുരുക്കുകയും ചെയ്യുന്നു. സ്‌കാട്സ് ട്രെയിനിങ്ങുകള്‍ ഇതിനൊരു ഉദാഹരണമാണ്. പേശികള്‍ വളരെ വേഗത്തില്‍ അയച്ചുകളയുന്ന രണ്ടാം ഘട്ടമാണ് സ്ട്രെച്ച്- ഷോര്‍ട്ടനിംഗ് ഘട്ടം. ഈ ഘട്ടത്തില്‍ പെട്ടെന്നുള്ളതും ശക്തിയേറിയതുമായ മസിലുകളുടെ ചുരുക്കമാണ് സംഭവിക്കുന്നത്. പേശികളുടെ ശക്തി കൂടാനും, കായിക ശേഷി കൂടാനും , ശരീരത്തിന്റെ ബാലന്‍സ്് നിലനിര്‍ത്താനും ഇതുവഴി സാധിക്കും.
ഹോപ് സ്‌കോച്ചുകള്‍, ജംപിങ്ങ് റോപ്, ജംപിങ്ങ് ജാക്കുകള്‍ എന്നിവ പ്ലയോമെട്രിക് ട്രെയിനിംഗുകള്‍ക്ക് ഒരു ഉദാഹരണമാണ്. സ്ഥിരമായി ഇത്തരം വ്യായാമങ്ങള്‍ ചെയ്യുമ്പോള്‍, എല്ലുകള്‍ ബലപ്പെടുകയും ശരീര ഭാരം നിയന്ത്രിച്ച് നിര്‍ത്താനും സാധിക്കുന്നു. ശരിയായ രീതിയില്‍ ചെയ്തു കഴിഞ്ഞാല്‍ ഇത്തരം വ്യായാമം സുരക്ഷിതവും ഫലവത്തവുമാണെന്ന് അമേരിക്കന്‍ കോളേജ് ഓഫ് സ്പോര്‍ട്സ് മെഡിസിന്‍ നടത്തിയ പഠനത്തില്‍ ചൂണ്ടിക്കാട്ടുന്നു. എന്നാല്‍, എല്ലുകള്‍ക്ക് ശക്തി കുറഞ്ഞവരും, കുട്ടികളും, ഉറച്ച എല്ലുകളുള്ള മുതര്‍ന്നവരും ഒരേ പോലെയല്ല ഈ വ്യായാമത്തില്‍ ഏര്‍പ്പെടേണ്ടതെന്നും പഠനം ചൂണ്ടിക്കാട്ടുന്നു. ചെറു പ്രായത്തിലേ ഇത്തരം വ്യായാമ രീതികളുമായി പരിചയപ്പെടുത്തുന്നതാണ് അഭികാമ്യം. എന്നാല്‍, ഇതൊരു സമ്പൂര്‍ണ്ണ വ്യായാമ രീതിയല്ല. പ്ലയോമെട്രിക് ട്രെയിനിംഗുകള്‍ ഒറ്റക്ക് ചെയ്യുന്നതിന് പകരം മറ്റ് വ്യായമ മുറകള്‍ക്കൊപ്പം ചെയ്യുന്നതാണ് നല്ലത്.
