ഒരു സ്ത്രീ കടന്നുപോകുന്ന സുപ്രധാന ഘട്ടങ്ങളിലൊന്നാണ് ഗര്‍ഭധാരണവും പ്രസവവും.അത് അവരുടെ ജീവിതരീതിയിലും ആരോഗ്യത്തിലും വലിയ മാറ്റങ്ങള്‍ കൊണ്ടുവരുന്നു. ഗര്‍ഭധാരണത്തിനു ശേഷം ശരീരത്തിന്റെ ആകൃതി, ഹോര്‍മോണുകള്‍, ശരീരഭാരം, സ്ട്രെച്ച് മാര്‍ക്കുകള്‍ തുടങ്ങിയവയില്‍ ചില മാറ്റങ്ങള്‍ കണ്ടുവരാറുണ്ട്. നാഷണല്‍ ലൈബ്രറി ഓഫ് മെഡിസിന്‍ പ്രകാരം, ഏകദേശം ആറ് മുതല്‍ 14 ശതമാനം വരെ സ്ത്രീകള്‍ക്ക് നവജാത ശിശു ജനിച്ച് ഒരു വര്‍ഷത്തിനുള്ളില്‍ അമിതഭാരമുണ്ടാകാന്‍ സാധ്യതയുണ്ട്. അമേരിക്കന്‍ ജേണല്‍ ഓഫ് ഒബ്സ്റ്റട്രിക്‌സ് ആന്‍ഡ് ഗൈനക്കോളജിയില്‍ പ്രസിദ്ധീകരിച്ച ഗവേഷണമനുസരിച്ച്, ഗര്‍ഭാവസ്ഥ.യില്‍ ഭാരം വര്‍ദ്ധിക്കുന്നത് കുഞ്ഞ്, മറുപിള്ള, രക്തം, ഗര്‍ഭാശയ വര്‍ദ്ധനവ്, അധിക കൊഴുപ്പ് സംഭരണം, അമ്നിയോട്ടിക് ദ്രാവകങ്ങള്‍, സ്തന കോശങ്ങള്‍ എന്നിവ കാരണമാണ്.
വിവിധ ആരോഗ്യപ്രശ്നങ്ങള്‍, പ്രമേഹം, പിസിഒഎസ്, വ്യായാമക്കുറവ്, സമ്മര്‍ദ്ദം, ഉറക്കക്കുറവ്, തൈറോയ്ഡ് പ്രശ്നങ്ങള്‍ തുടങ്ങിയ നിരവധി കാരണങ്ങള്‍ പ്രസവശേഷമുള്ള ശരീരഭാര വര്‍ധനവിനെ ഉത്തേജിപ്പിക്കും. അമ്മയുടെ ഉത്തരവാദിത്വങ്ങള്‍ നിറവേറ്റുന്നതോടൊപ്പം സ്വന്തം ശരീരത്തെ പരിപാലിക്കുന്നതും ഈ ഘട്ടത്തില്‍ വെല്ലുവിളികള്‍ നിറഞ്ഞതാണ്. എന്നിരുന്നാലും, ചില ലളിതമായ കാര്യങ്ങളിലൂടെ ഗര്‍ഭധാരണത്തിനു ശേഷമുള്ള ശരീര ഭാര വര്‍ധനവിനെ മറികടക്കാന്‍ നിങ്ങള്‍ക്കാകും. അവയെന്തൊക്കെയെന്നാണ് ഇനി പറയുന്നത്.
1. കലോറി ഉപഭോഗം നിരീക്ഷിക്കുക
പ്രമുഖ ഹെല്‍ത്ത്ഫിറ്റ്‌നസ് വെബ്‌സൈറ്റായ ഹെല്‍ത്ത്‌ലൈന്‍ പറയുന്നത് പ്രകാരം , നിങ്ങളുടെ കലോറി ഉപഭോഗം നിരീക്ഷിക്കുന്നത് ഗര്‍ഭധാരണത്തിനു ശേഷമുള്ള ശരീരഭാര വര്‍ധനവിനെ തടയിടും. ഒരു ഡയറി സൂക്ഷിച്ചോ മൊബൈല്‍ കലോറി ട്രാക്കിംഗ് ആപ്പ് ഉപുയോഗിച്ച് കൊണ്ടോ നിങ്ങള്‍ക്ക് നിങ്ങളുടെ കലോറി ഉപഭോഗം പരിശോധിക്കാം. ഇത് നിങ്ങളുടെ ശരീരത്തിലേക്ക് ഭക്ഷണത്തിലൂടെ അധിക കലോറി എത്തുന്നത് തടയിടുന്നതിനും ആരോഗ്യകരമായ ഭക്ഷണങ്ങള്‍ തിരഞ്ഞെടുക്കുന്നതിനും സഹായിക്കും.
2. നാരുകള്‍ അധികമുള്ള ഭക്ഷണം കഴിക്കുക
മുട്ട, പയര്‍വര്‍ഗ്ഗങ്ങള്‍, പരിപ്പ്, വിത്തുകള്‍, നാരുകള്‍ അടങ്ങിയ പാലുല്‍പ്പന്നങ്ങള്‍ തുടങ്ങിയ ഭക്ഷണങ്ങള്‍ ഉള്‍പ്പെടുത്തുന്നത് ഗര്‍ഭാവസ്ഥയ്ക്ക് ശേഷമുള്ള അധിക ഭാരം കുറയ്ക്കുന്നതിനുള്ള മികച്ച മാര്‍ഗമാണ്. പ്രോട്ടീനും നാരുകളുമടങ്ങിയ ഭക്ഷണങ്ങള്‍ കൂടുതല്‍ നേരം വയറ് നിറഞ്ഞെന്ന തോന്നലുണ്ടാക്കാനും അധികം ഭക്ഷണം കഴിക്കുന്നത് തടയാനും സഹായിക്കും.
3. വ്യായാമം
പ്രസവശേഷം ശരീരഭാരം കുറയ്ക്കാനുള്ള മികച്ച മാര്‍ഗമാണ് വ്യായാമം. എന്നാല്‍ ഇത് ചെയ്യേണ്ടത് ഡോക്ടറുടെ നിര്‍ദേശപ്രകാരം മാത്രമായിരിക്കണമെന്നത് പ്രത്യേകം ശ്രദ്ധിക്കുക. വേഗത്തിലുള്ള നടത്തം, ഫ്ലട്ടര്‍ കിക്കുകള്‍, ലെഗ് എക്സ്റ്റന്‍ഷന്‍, പ്ലാങ്കുകള്‍ തുടങ്ങി നിരവധി വ്യായാമങ്ങള്‍ ഗര്‍ഭധാരണത്തിനു ശേഷമുള്ള ശരീരഭാരം കുറയ്ക്കാന്‍ ഫലപ്രദമാണ്. എന്നാല്‍ ഇവ ഒരു ഫിറ്റ്‌നസ് ട്രെയിനറുടെ സഹായത്തില്‍ മാത്രം പരിശീലിക്കുകയെന്നതും പ്രധാനമാണ്.
4.പഞ്ചസാരയും ശുദ്ധീകരിച്ച കാര്‍ബോഹൈഡ്രേറ്റുകളും ഒഴിവാക്കുക
ഹെല്‍ത്ത്‌ലൈന്‍ പറയുന്നതനുസരിച്ച്, പഞ്ചസാര ചേര്‍ത്ത പാനീയങ്ങള്‍, പഴച്ചാറുകള്‍, കേക്കുകള്‍, പേസ്ട്രികള്‍, ബിസ്‌ക്കറ്റുകള്‍, വെളുത്ത മാവ് തുടങ്ങിയ പഞ്ചസാരയുടെ സാധാരണ ഉറവിടങ്ങള്‍ പ്രസവ ശേഷം ഒഴിവാക്കണം. പഞ്ചസാരയും ശുദ്ധീകരിച്ച കാര്‍ബോഹൈഡ്രേറ്റുകളും ഒഴിവാക്കി പകരം പച്ചക്കറികള്‍, മത്സ്യം, മുട്ട, തൈര്, നിങ്ങളുടെ ഡോക്ടര്‍ നിര്‍ദ്ദേശിക്കുന്ന പഴങ്ങള്‍ എന്നിവയില്‍ ശ്രദ്ധ കേന്ദ്രീകരിക്കണം.
5. ശാരീരികമായി സജീവമായിരിക്കുക
കുറഞ്ഞ കലോറി ഉപഭോഗത്തോടൊപ്പം ലളിതമായ നടത്തം നിങ്ങള്‍ക്ക് ആരംഭിക്കാം. പതിവ് ശാരീരിക പ്രവര്‍ത്തനങ്ങള്‍ നിങ്ങളുടെ ശരീരത്തെ പുനരുജ്ജീവിപ്പിക്കുകയും നിങ്ങളുടെ പേശികളെയും മൊത്തത്തില്‍ ശരീരത്തെയും ശക്തിപ്പെടുത്തുകയും ചെയ്യും. സെന്റര്‍സ് ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ (സിഡിസി)പറയുന്നത് അനുസരിച്ച്, വ്യായാമം ഹൃദയാരോഗ്യം മെച്ചപ്പെടുത്തുകയും ഗര്‍ഭധാരണത്തിനു ശേഷമുള്ള ശരീരഭാരം കുറയ്ക്കുന്നതില്‍ പ്രധാന പങ്ക് വഹിക്കുകയും ചെയ്യ്ുന്നു. പ്രമേഹത്തിന്റെ സങ്കീര്‍ണാവസ്ഥ കുറയ്ക്കുകയും ചെയ്യുന്നു.
6. മതിയായ ഉറക്കം
ശരാശരി 5 മണിക്കൂറില്‍ താഴെയോ 8 മണിക്കൂറില്‍ കൂടുതലോ ഉറങ്ങുന്നത് ശരീരഭാരം വര്‍ദ്ധിപ്പിക്കുന്നതുമായി നേരിട്ട് ബന്ധപ്പെട്ടിരിക്കുന്നുവെന്ന് പല പഠനങ്ങളും കണ്ടെത്തിയിട്ടുണ്ട്. യൂണിവേഴ്‌സിറ്റി ഓഫ് കാലിഫോര്‍ണിയയുടെ പഠനമനുസരിച്ച്, 24 മണിക്കൂറില്‍ 5 മണിക്കൂറില്‍ താഴെ ഉറങ്ങുന്നത് പ്രസവശേഷം ഒരു വര്‍ഷത്തിനുള്ളില്‍ ഗണ്യമായ തോതില്‍ ഭാരം വര്‍ധിക്കാനിടയാാക്കുന്നു. അതിനാല്‍, ഗര്‍ഭധാരണത്തിനു ശേഷമുള്ള ശരീരഭാരം വര്‍ദ്ധിപ്പിക്കുന്നതിന് കാരണമാകുന്ന സമ്മര്‍ദ്ദത്തില്‍ നിന്നും മറ്റ് ഘടകങ്ങളില്‍ നിന്നും നിങ്ങളുടെ ശരീരത്തെ അകറ്റി നിര്‍ത്താന്‍ ആവശ്യമായ തോതില്‍ ഉറുങ്ങുന്നുവെന്ന് ഉറപ്പുവരുത്തുക
