സ്ത്രീകളിലെ അമിതവണ്ണം പലപ്പോഴും മറ്റു ചില രോഗങ്ങളുടെ ലക്ഷണങ്ങള്‍ കൂടിയാണ്. ചില അവസ്ഥകളില്‍ ഹോര്‍മോണ്‍ വ്യതിയാനം സ്ത്രീകളില്‍ അമിതവണ്ണമെന്ന പ്രശ്‌നത്തിലേക്കാണ് എത്തിക്കുക. പോളിസിസ്റ്റിക് ഓവറി ഡിസീസും(പിസിഒഎസ്) പൊണ്ണത്തടിയും പരസ്പരം ബന്ധപ്പെട്ടിരിക്കുന്ന അവസ്ഥയാണ്. ഇത്തരം രോഗാവസ്ഥകള്‍ ഉള്ള സ്ത്രീകള്‍ പലപ്പോഴും തടി കുറക്കുക എന്നത് വളരെയധികം വെല്ലുവിളി ഉണ്ടാക്കുന്ന കാര്യമാണ്. എന്നാല്‍ ഈ രോഗമുള്ള സ്ത്രീകള്‍ ശരീരഭാരം കുറയ്ക്കേണ്ടത് അത്യാവശ്യവുമാണ്. സ്ത്രീകളില്‍ അമിതവണ്ണത്തിലേക്ക് നയിക്കുന്ന കാരണങ്ങളില്‍ പ്രധാനപ്പെട്ടതാണ് പിസിഒഎസ്. അതിനെ പ്രതിരോധിക്കുന്നതിന് വേണ്ടിയും ആരോഗ്യമുള്ള ജീവിത ശൈലി സ്വായത്തമാക്കാനും നമുക്ക് ചില കാര്യങ്ങള്‍ ചെയ്യാവുന്നതാണ്.
എല്ലാ സ്ത്രീകളും പിസിഒഎസ് എന്ന രോഗാവസ്ഥയെക്കുറിച്ച് അറിഞ്ഞിരിക്കേണ്ടതാണ്. പ്രത്യുല്‍പാദനശേഷിയുള്ള സ്ത്രീകളില്‍ കാണപ്പെടുന്ന ഒരു സാധാരണ ഹോര്‍മോണ്‍ തകരാറാണ് പിസിഒഎസ്. പിസിഒഎസ് ഉള്ള സ്ത്രീകള്‍ക്ക് ഫോളിക്കിള്‍സ് എന്ന് വിളിക്കപ്പെടുന്ന ദ്രാവകത്തിന്റെ ഒന്നിലധികം ചെറിയ കൂട്ടങ്ങള്‍ പലപ്പോഴും അണ്ഡാശയത്തെ വലുതാക്കുന്നു. ഈ അവസ്ഥയില്‍ ശരീരത്തിന്റെ ഇന്‍സുലിന്‍ പ്രതിരോധം വര്‍ദ്ധിക്കുകയും ഒപ്പം ആന്‍ഡ്രോജന്‍ എന്ന പുരുഷ ഹോര്‍മോണുകളുടെ ഉയര്‍ന്ന അളവും ശരീരത്തിലുണ്ടാകുന്നു. പലപ്പോഴും പിസിഒഎസിനൊപ്പം പ്രമേഹ സാധ്യതയും സ്ത്രീകളിലുണ്ടാകുന്നു.
പിസിഒഎസ് ലക്ഷണങ്ങള്‍
ആര്‍ത്തവ ക്രമക്കേടുകള്‍, മുഖക്കുരു, ശരീരത്തിലെ അമിത രോമവളര്‍ച്ച, വന്ധ്യത, ഇന്‍സുലിന്‍ പ്രതിരോധം, ചില സമയങ്ങളില്‍ പ്രമേഹം, മുടി കൊഴിച്ചില്‍ തുടങ്ങിയവ പിസിഒഎസുമായി ബന്ധപ്പെട്ട ചില പൊതു ലക്ഷണങ്ങളാണ്. എന്നാല്‍ ചിലരില്‍ അമിതവണ്ണത്തിനും കാരണമാകുന്നു. പിസിഒഎസും അമിതവണ്ണവും വളരെയധികം സങ്കീര്‍ണമായ അവസ്ഥയാണ്. ഇത് കൂടുതല്‍ അപകടത്തിലേക്കാണ് ഓരോ സ്ത്രീകളേയും എത്തിക്കുന്നത്. അമിതവണ്ണം പലരിലും ആത്മവിശ്വാസം കുറക്കുന്നതിനും കാരണമാകുന്നു.
പ്രതിവിധി
പിസിഒഎസ് ഉള്ള സ്ത്രീകള്‍ എത്രയും പെട്ടെന്ന് ഒരു സ്‌പെഷ്യലിസ്റ്റിനെ കാണുകയും വൈദ്യസഹായം തേടുകയും ചെയ്യണം. ഏറ്റവും പ്രധാന ഘടകം ശരീരഭാരം കുറയ്ക്കുക എന്നതാണ്. എന്നാല്‍ പിസിഒഎസ് ബാധിച്ച ഒരു വ്യക്തിക്ക് ശരീരഭാരം കുറയ്ക്കാന്‍ കൂടുതല്‍ ബുദ്ധിമുട്ടാണെന്നത് തിരിച്ചറിയേണ്ടത് പ്രധാനമാണ്. അതുകൊണ്ട് തന്നെ ഒന്നോ രണ്ടോ ആഴ്ചയുടെ പരിശ്രമത്തില്‍ ശരീരഭാരം കുറയുകയില്ല. നിരന്തരമായ പരിശ്രമം ഇതിന് ആവശ്യമാണ്.
ഭക്ഷണകാര്യത്തിലും ശ്രദ്ധവേണം. നാരുകള്‍ കൂടുതലുള്ളതും പഞ്ചസാര കുറഞ്ഞതുമായ ഭക്ഷണക്രമം തിരഞ്ഞെടുക്കുക. ആഹാരത്തില്‍ പഴങ്ങളും പച്ചക്കറികളും ധാന്യങ്ങളും ഉള്‍പ്പെടുത്താന്‍ ശ്രദ്ധിക്കണം. രക്തത്തിലെ പഞ്ചസാരയുടെ അളവില്‍ ഏറ്റക്കുറച്ചിലുകള്‍ ഒഴിവാക്കാന്‍ പ്രോസസ് ചെയ്തതും കൊഴുപ്പുള്ളതുമായ ഭക്ഷണങ്ങള്‍ ഒഴിവാക്കുക. എന്ത് കഴിക്കണം, ഒഴിവാക്കണം എന്നതിനെക്കുറിച്ച് ഒരു ഡയറ്റീഷ്യന്റെ സഹായം തേടേണ്ടതാണ്. ദിവസവും ചെറിയ അളവില്‍ ഭക്ഷണം കഴിക്കാന്‍ ശീലിക്കണം.
ആഴ്ചയില്‍ 5 ദിവസമെങ്കിലും 30 മുതല്‍ 45 മിനിറ്റ് വരെ മിതമായ വ്യായാമത്തില്‍ ഏര്‍പ്പെടുക. ആവശ്യത്തിന് വെള്ളം കുടിക്കുക, പുകവലിയും മദ്യവും ഒഴിവാക്കുക. നല്ല ഉറക്കം പാലിക്കുക, സമ്മര്‍ദ്ദം ഒഴിവാക്കാന്‍ ശ്രമിക്കുക. ആത്മാര്‍ത്ഥമായ പരിശ്രമങ്ങള്‍ നടത്തിയിട്ടും ശരീരഭാരം നിയന്ത്രണവിധേയമാകുന്നില്ലെങ്കില്‍ മികച്ച ഫിറ്റ്നസ് ട്രെയ്നറുടെ സഹായം തേടേണ്ടതാണ്.
തയ്യാറാക്കിയത്: റഫീഷ പി
